Bul kıno baıqaý 5-25 tamyz aralyǵynda Kanadada ótedi.
Rejıser-debútant Raıymbek Áljanovtyń «Mergen» atty qysqametrajdy fılmi janrlyq kınolarǵa arnalǵan álemdegi bedeldi festıválderdiń biri – halyqaralyq Fantasia kınofestıvaline qatysady, dep habarlaıdy Almaty-akshamy.kz «Qazaqfılm» AQ-nyń baspasóz qyzmetine silteme jasap.
Kınotýyndyny QR Mádenıet jáne sport mınıstrligi tapsyrysy boıynsha «Ulttyq kınony qoldaý ortalyǵy» KEAQ qoldaýymen Sh.Aımanov atyndaǵy «Qazaqfılm» AQ túsirgen.
«Mergen» fılminiń alǵashqy kórsetilimi Fantasia kınofestıvali sheńberinde ótetinine óte qýanyshtymyz. Montajdaý jumystary aıaqtala salysymen, fılmdi osy baıqaýǵa jiberdik. Osy oraıda maǵan qoldaý bildirip, fılmniń shyǵýyna atsalysqan barlyq túsirý tobyna erekshe alǵysymdy bildirgim keledi», - dedi rejıser Raıymbek Áljanov.
Fılmniń oqıǵasy XVII ǵasyrdaǵy Uly daladaǵy soǵys kezinde órbıdi. Atalǵan fılmde jas ta bolsa, qolyna qarý alyp, otbasyn qoǵaýǵa bel býǵan Mergen esimdi balanyń ómiri baıandalady. Fılmdegi basty róldi Álıhan Ábı somdaıdy. Sondaı-aq bul kartınaǵa Raıhan Aıtqojanova jáne Dýlyǵa Aqmolda syndy tanymal akterler túsken. Fılmniń túsirý jumystary Almaty oblysyndaǵy Túrgen shatqalynda jáne «Qazaqfılmniń» pavılondarynda júrgizildi.
Osymen 25-shi ret ótkizilip jatqan Fantasia halyqaralyq kınofestıvali - álemdegi janrlyq fılmderge arnalǵan birden bir baıqaý. Atalǵan kınofestıval sheńberinde Kventın Tarantıno túsirgen «Beslavnye ýblúdkı», Tımýr Bekmambetovtyń «Nochnoı dozor», sondaı-aq «Pýnkt naznachenıa» franshızasynyń bir bóliminiń tusaýy kesilgen bolatyn.
Aıta ketsek, festıváldiń Radical spirit atty qysqametrajdy fılmderge arnalǵan baıqaýyna qazaqstandyq kınotýyndymen birge Ulybrıtanıa, Meksıka, Avstralıa, AQSH, Qytaı jáne Ońtústik Koreıanyń týyndylary qatysady.