Ruqsat etilmegen qoqystardyń bolýy búgingi tańda birinshi kezektegi máselelerdiń biri bolyp tabylady.
Qazaqstandyq ekologtar respýblıka boıynsha birqatar óńirlerde ruqsat etilmegen qoqys úıindileriniń aldyn alý jáne joıý boıynsha reıdtik is-sharalar ótkizdi. Nátıjesinde 4 763 ruqsat etilmegen qoqys úıindisin anyqtady, dep habarlaıdy Almaty-akshamy.kz.
Qolaıly emes statısıkany eskersek, bul problemany sheshý barlyq múddeli uıymdardy, onyń ishinde qoǵamdy tarta otyryp, túbegeıli sharalardy qoldanýdy talap etedi.
«Buǵan deıin Memleket basshysy QR Úkimetiniń sońǵy keńeıtilgen otyrysynda osyndaı tapsyrma bergen bolatyn jáne ony oryndaý aıasynda QR Ekologıa, geologıa jáne tabıǵı resýrstar mınıstrligi QR Aqparat jáne qoǵamdyq damý mınıstrligimen birlesip ruqsat etilmegen qoqys úıindilerin anyqtaý jáne olardyń paıda bolýynyń aldyn-alý boıynsha aýqymdy is-shara uıymdastyrdy. Birinshi reıd aǵymdaǵy jyldyń 24 maýsymynda bastaldy jáne ony bir mezgilde bes iri óńir: Qaraǵandy, Pavlodar, Almaty, Aqmola jáne Shyǵys Qazaqstan oblystary ótkizdi», – delingen Ekologıa, geologıa jáne tabıǵy resýrstar mınıstrliginiń baspasóz qyzmetiniń habarlamasynda.
Mamandardyń habarlaýynsha, rekreasıalyq aımaqtarǵa ekologıa departamentteriniń, ákimdikterdiń, jergilikti polısıa qyzmetiniń ókilderi jáne 30-dan astam ekovolonterler shyqty.
Bir kúndik jumys nátıjesinde 20 zańsyz qoqys orny anyqtaldy, olardyń 13-i sol kúni joıyldy. Sonymen qatar, 6 eskertý berilip, 10 AEK kóleminde ákimshilik aıyppul salyndy.
Ekologtar bul reıdtik is-sharalardyń bastamasy ǵana ekenin eskertip otyr. Apatty úıindilerdi joıý kestesi aǵymdaǵy jyldyń qyrkúıek aıynyń sońyna deıin barlyq óńirlerge merzimdi saparlardy qarastyrady.Keıingi reıdterdiń nátıjeleri qosymsha jarıalanatyn bolady.
