Qazaq aǵaıyndar elge kelýde
Aýǵanstannan 35 etnıkalyq qazaq Qazaqstanǵa evakýasıalandy, dep habarlaıdy Almaty-akshamy.kz Qazaqtv.com caıtyna silteme jasap.
Qandastarymyzdy atamekenge qaıtarý Memleket basshysy Qasym-Jomart Toqaevtyń tapsyrmasymen júzege asyryldy. Qorǵanys mınıstrliginiń arnaıy ushaǵy Kabýldan ushyp shyǵyp, Almaty áýejaıyna qondy.
Jolaýshylardyń barlyǵy karantındik sharalardy ótý úshin oqshaýlaý ortalyǵyna jetkizildi. Reıs «talıban» qozǵalysynyń kelisimimen júzege asty, dep habarlaıdy elimizdiń Syrtqy ister mınıstrligi. Qazir Kabýl qalasyndaǵy Qazaqstannyń elshiligi qalypty rejımde jumys istep jatyr.
Dıplomattar aýǵan jerindegi qandastarmen turaqty baılanysta. Olardyń ultyn rastaý jumystary jalǵasýda.
«Almaty áýejaıyna Aýǵanstan aýmaǵynan etnıkalyq qazaqtardyń birinshi legi kelip qondy. Ózimizdiń qandastardy Aýǵanstannan shyǵarý Memleket basshysy Qasym-Jomart Toqaevtyń tapsyrmasyna sáıkes, Syrtqy ister mınıstrliginiń uıymdastyrýymen jáne Qazaqstan Respýblıkasynyń Kabýldaǵy elshiliginiń qoldaýymen bolǵan edi», - dedi «Otandastar» qorynyń vıse-prezıdenti Maǵaýıa Sarbasov.
Sonymen qatar Hasan Derman esimdi qandasymyz rızashylyǵyn bildirdi.
«Maǵan kómektesip, qoldap kelgenderińiz úshin úlken rahmet! Qazaqstan Prezıdentine, ózge de qol ushyn berip kómekteskenderge, jýrnalıserge, Aýǵanstandaǵy elshilikke alǵysym sheksiz. Aman bolyńyzdar! Atamekenge, tarıhı otanymyzǵa kelgenimizge qýanyshtymyz. Jubaıym kele almady. Pasporty joq», - dedi ol.