Búgin – Qazaqstandaǵy ǵylym qyzmetkerleri kúni.
1990 jyldary elde ǵalymdardyń sany 40 myńdaı bolsa, qazir 23 myńnan asady. Toqyraý kezeńinde ǵalymdarymyzdyń kóbi bızneske bet bursa, birshamasy shetel asqan. Bul kúnde sol ózge elde ǵylymmen aınalysyp júrgen qazaq ǵalymdary eldiń jas ǵalymdaryn oqytyp júr, dep habarlaıdy almaty-akshamy.kz.
- Kópshilik sol ózimizdiń jerlesterimiz sol jaqta jumysyn jalǵastyra berse degen oıdamyz. Kelip jatatyn bolsa, bizge osy elimizdiń jas ǵalymdaryn tárbıeleýde kómektesedi. Ol bizge eń ońtaıly joldardyń biri. Óıtkeni naqty álemdik deńgeıde júzege asyp jatqan ǵylymı jetistikterdiń ózderi sol básekelestik deńgeıinde bolý kerek. Kelem degenderdi laboratorıaǵa qalyptastyrý kerek. Jas ǵalymdardy berý kerek tárbıeleýge, deıdi Ǵylym jáne joǵary bilim vıse-mınıstri Darhan Ahmed-Zakı.
Resmı derekterge súıensek, keıingi on jylda eldegi ǵylym salasyna bólingen qarjy jalpy ishki ónimniń 0.13 paıyzynan asqan emes. Al keleshekte bul kórsetkishti 1 paıyzdan asyrý kózdelip otyr. Keıingi 3 jylda bul salaǵa 650 mlrd-tan astam qarjy bólingen.
- Ǵylymnyń damýy úshin ǵylym salasynyń bedelin kóterý qajet dep oılaımyn. Jastar óz elimizde de múmkindigi mol zerthanalar baryn, memlekettik qoldaýdyń baryn bilýi qajet. Sonda el jastary ǵylymǵa qyzyǵyp, ártúrli jańashyldyqtar ashatyn bolady, - deıdi NÝ UǴA bıoınjenerıa jáne regeneratıvti medısına zerthanasynyń meńgerýshisi Sholpan Asqarova,
Ǵylymnyń ár salasy mańyzdy. Birin keıinge qaldyryp, ekinshisine basymdyq bere almaımyz.
- Ǵylymnyń kez kelgen salasy mańyzdy. Mysalǵa biz pandemıa kezinde sezindik bıotehnologıany, taǵy basqa medısına salasyn damytý kerek ekenin, soǵan qarjy kóptep quıý kerek ekenin sezdik. Al endi búgingi tańda Qazaqstanda bolyp jatqan tabıǵı apattarǵa qaraı otyryp, sý salasynyń mamandaryn, gıdrologtardy, geologıa salasyndaǵy ǵalymdardy, taǵy basqa osy salaǵa basymdyq berý kerek ekenin bilip jatyrmyz. Erteń osyndaı bir kez kelgen kemshilikterdiń bolýyn boldyrmas úshin ǵylymnyń kez kelgen salasyna múmkindik berý qajet, - deıdi Sátbaev ýnıversıtetiniń ınjenerlik beıindi zerthana jetekshisi Azat Seıthan.
Buǵan deıin elde ǵylymnyń 96 salasy bolsa, aldaǵy ýaqytta olar biriktirilip, naqty 6 basym baǵyty boıynsha jumys atqarylady. Onyń ishine álemdik ǵylymnyń, tehnologıanyń jańa baǵyttary nazarǵa alyndy.
Istochnık: https://24.kz/kz/zha-aly-tar/bilim-zh-ne-ylym/item/647493-aly-alaj-aza-ylymy
Qoldanylǵan materıaldarǵa mindetti túrde www.24.kz saıtyna gıpersilteme berilýi tıis