Jınaqqa HIX – HH ǵasyrdyń birinshi jartysynda jınaqtalǵan, orys tiline aýdarylǵan jáne ártúrli basylymdarda jarıalanǵan qazaq halyq ertegileri engizilgen.
Máskeýdegi Qazaqstannyń Elshiliginde “Úsh júz qazaq ertegisi” eki tomdyq kitabynyń tusaýkeseri ótti, dep habarlaıdy Almaty-akshamy.kz
Oǵan belgili fólklortanýshy Vıktor Sıdelnıkov daıyndaǵan Qazaq KSR Ǵylym akademıasynyń úsh tomdyq (1958-1964) basylymynyń mátinderi negiz boldy.
Sharany ashqan Qazaqstannyń Reseıdegi Elshisi Dáýren Abaev jınaqty qazaq halqynyń baı mádenıetin tanytatyn jaı ǵana kitap emes, urpaqtan-urpaqqa jalǵasyp kele jatqan, shekarany bilmeıtin sıqyrly, shytyrman oqıǵaly jáne danalyq álemi dep atady. Ol eki tomdyq kitap árkimge balalyq shaqqa qaıta súńgip, ertegi oqıǵasyn jańasha sezinýge múmkindik beretinine senim bildirdi. Elshi shyǵarmashylyq ujymǵa qazaq ádebıetine osyndaı jyly kózqarasy úshin alǵysyn bildirdi.
Óz kezeginde basylymnyń birlesken bastamashysy, Memleketaralyq damý korporasıasynyń bas dırektory Ivan Polákov kitap ıdeıasynyń qalaı týǵandyǵymen bólisti.
“Jas kezimde qazaq aýyz ádebıeti maǵan qatty áser etti. Kóp jyldardan keıin men balalarymdy Qazaqstannyń halyq ónerimen tanystyrǵym keldi. Alaıda men esh jerden laıyqty ádebıet taba almadym. Osyǵan baılanysty qazaq ertegilerin qaıta basyp shyǵarý jumystaryn júrgizý ıdeıasy týyndady”, – dep atap ótken Ivan Polákov kitap Qazaqstan men Reseı halyqtary arasyndaǵy ózara túsinistikti nyǵaıtýǵa septigin tıgizetinin aıtty.
“Ves Mır” baspasynyń dırektory ári bas redaktory Oleg Zımarın Qazaqstanǵa saparlarynyń birinde qazaq ertegilerimen tanys bolǵanyn eske aldy. “Ertegiler – ulttyq bolmystyń, minezdiń, psıhologıanyń, adamdyq danalyqtyń kórinisi. Qarapaıym ómirde biz ulttyq fólklorǵa qanshalyqty qanyqqanymyzdy da tolyq túsinbeımiz”, – dedi ol.
Sharaǵa qatysýshylardyń aıtýynsha, shym-shytyryq sújetti, ázil men qıaldy qamtıtyn tartymdy mátinderi bar “Qazaqtyń úsh júz ertegisi” jınaǵy óz oqyrmanyn taýyp, barlyq jastaǵy adamdardyń qyzyǵýshylyǵyn týdyrmaq.
Joba Qazaqstannyń Reseıdegi burynǵy Elshisi Ermek Kósherbaevtyń bastamasymen jáne qoldaýymen júzege asty. Kitaptaǵy ılústrasıalardy jas sýretshi Áıgerim Ýálıhanova men Ksenıa Býrkova jasaǵan.