Eýroparlamentpen áriptestik artyp keledi
Brússelde qazaqstandyq depýtattar Eýroparlamenttegi áriptesterimen kezdesti, dep habarlaıdy Almaty-akshamy.kz. 24.kz-ke silteme jasap.
Jıynda Qazaqstan men Eýroodaq arasyndaǵy keńeıtilgen seriktestik pen yntymaqtastyq týraly kelisimdi iske asyrý jaıy talqylandy. Sondaı-aq koronavırýs pandemıasymen kúreste tájirıbe almasty.
Budan bólek, taraptar indetten keıin Qazaqstan men Eýroodaqta júrgizilip jatqan áleýmettik-ekonomıkalyq reformalar jaıyn sóz etti.
«Birinshi kezekte, tájirıbe almasý jaǵy sóz boldy. Biz Prezıdent Qasym-Jomart Toqaev bastamashy bolǵany reformalar týraly, Parlamenttiń atalǵan reformalardy zańnamalyq turǵyda júzege asyrylýyn qalaı qamtamasyz etip jatqany týraly, Ulttyq qoǵamdyq senim keńesi týraly aıttyq. Sonymen qatar, biz halyqaralyq saıasat máseleleri sonyń ishinde Aýǵanstan jóninde sóılestik. Buǵan qosa, bizdiń pandemıamen kúresýdegi tájirıbemiz de áriptesterimizdiń qyzyǵýshylyǵyn týdyrdy. «Ashyq» júıesi olardy qatty tańqaldyrdy», - dedi QR Parlamenti Májilisiniń Halyqaralyq ister, qorǵanys jáne qaýipsizdik komıtetiniń tóraıymy Aıgúl Quspan.
Ortalyq Azıa elderimen yntymaqtastyq jónindegi eýroparlament delegasıasynyń basshysy Fýlvıo Martýshello, Qazaqstan Eýroodaq úshin Ortalyq Azıadaǵy senimdi jáne mańyzdy seriktes bolyp tabylatynyn aıtty.
«Sizderdiń elderińizben aradaǵy qarym-qatynasymyz óte jaqsy. Qazaqstan Eýroodaq úshin Ortalyq Azıadaǵy senimdi jáne mańyzdy seriktes bolyp tabylady. Búgin biz Qazaqstan Parlamentiniń delegasıasymen kezdesip, yntymaqtastyǵymyzdy talqyladyq. Kóptegen eýropalyq kásipkerler Qazaqstanda jaqsy ınvestısıalyq jaǵdaı jasalǵanyn aıtady. Jalpy, bizdi búginde Aýǵanstandaǵy ahýal qatty alańdatady. Sondyqtan Eýroodaq pen Qazaqstan úshin terorızmmen jáne esirtki bıznesimen kúreste, onyń ishinde shekaralyq baqylaýda birlese jumys isteý óte mańyzdy», - dedi ol.