Qasym-Jomart Toqaev Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovti qabyldady
Memleket basshysy AÓSSHK Syrtqy ister mınıstrleri Keńesiniń altynshy otyrysyna qatysý úshin elimizge kelgen Túrikmenstan Mınıstrler kabıneti tóraǵasynyń orynbasary – Syrtqy ister mınıstri Rashıd Meredovti qabyldady, dep habarlaıdy Almaty-akshamy.kz. Akorda.kz-ke silteme jasap.
Memleket basshysy Túrikmenstan ótkizgen Ortalyq Azıa memleketteri basshylarynyń úshinshi Konsýltatıvtik kezdesýinde yntymaqtastyqty odan ári kúsheıtý ári jańa múmkindikterge jol ashý maqsatymen ózekti máseleler talqylanǵanyn atap ótti. Qasym-Jomart Toqaev túrikmenstandyq dıplomatqa AÓSSHK Syrtqy ister mınıstrleri Keńesiniń altynshy otyrysyna qatysyp, Qazaqstannyń bastamalaryna qoldaý kórsetkeni úshin rızashylyǵyn bildirdi.
Kezdesýde Qazaqstan-Túrikmenstan qarym-qatynasynyń saıası, saýda-ekonomıkalyq salalary men aımaqtyq qaýipsizdik máseleleri talqylandy. Sonymen qatar Túrikmenstanda ótetin VI Kaspıı samıtine daıyndyq barysy qarastyryldy.
Rashıd Meredov Qazaqstan Prezıdentine qabyldaǵany úshin alǵys bildirip, Túrikmenstan Prezıdenti Gýrbangýly Berdimuhamedovtiń óz eline memlekettik saparmen kelýge shaqyrýyn tabys etti.
Qasym-Jomart Toqaev shaqyrtýdy qabyl alatynyn aıtyp, qazaq-túrikmen yntymaqtastyǵyna barlyq sala boıynsha tyń serpin berý maqsatynda jýyq arada Ashhabadqa saparmen baratynyn jetkizdi.