Gıme murajaıynda «Qazaq dalasy órkenıetiniń mádenı kody» kórmesi ótedi
Fransıaǵa jumys sapary aıasynda QR Mádenıet jáne aqparat mınıstri Aıda Balaeva Gıme (Guimet) murajaıynyń prezıdenti Iannık Lıntspen kezdesti, dep habarlaıdy Almaty-akshamy.kz
Kezdesý barysynda Aıda Balaeva Qazaqstan-Fransıa qarym-qatynasy Prezıdentter Qasym-Jomart Toqaev pen Emmanýel Makronnyń ózara saparlarynan keıin damýǵa jańa serpin alǵanyn atap ótti.
Fransıa Prezıdentiniń Astanaǵa sapary aıasynda Gıme (Guimet) shyǵys óneri murajaıynda Qazaqstannyń tarıhı muralarynyń kórmesin ótkizý týraly aldyn ala ýaǵdalastyqqa qol jetkizildi.
Aıda Balaeva men Iannık Lınts aýqymdy sharanyń jaı-japsaryn talqylady.
Álemge áıgili Gıme (Guimet) murajaıy Azıa óneriniń álemdegi eń tolyq jáne Eýropadaǵy eń úlken koleksıasyna ıe.
Murajaı prezıdenti qoımalarda Qazaqstannan alynǵan birneshe jádiger bar ekenin, alaıda jurtshylyqtyń qyzyǵýshylyǵyn eskere otyryp, mýzeı qazaq mádenıeti men tarıhyn sıpattaıtyn mańyzdy jádigerlerdi kóbirek usynǵysy keletinin aıtty.
«Munda Eýropada, ásirese Fransıada Uly Jibek jolynyń bir bóligi bolǵan dúnıejúzi aımaǵynyń mańyzyn qazir kóp adamdar túsinedi. Shyǵys pen Batystyń, Soltústik pen Ońtústiktiń arasynda mádenıetterdiń qalaı ótkenin de túsinemiz. Búgingi álemde mádenı kezdesýlerdi beıneleıtin aımaqty kórsete bilý óte mańyzdy. Qazaqstannyń uly dúnıejúzilik tarıhpen baılanysy týraly aıtý kerek», – dedi Iannık Lıns.
Óz kezeginde Mádenıet mınıstri «Qazaq dalasy órkenıetiniń mádenı kody» ulttyq kórmesiniń ekspozısıasynda tarıh pen mádenıet úshin mańyzy zor jáne buryn sheteldik kórermenderge usynylmaǵan jádigerler qoıylatynyn atap ótti.
«Árıne, kórme elimizdiń baı jáne qaıtalanbas mádenı murasyn kórsetip, memleketter arasyndaǵy dostyq baılanysty nyǵaıtady», - dep atap ótti Aıda Balaeva.