5 qazan kúni Nú-Iorkte álemge áıgili Madison Square Garden arenasynda alǵash ret Qazaqstannyń Ánurany shyrqaldy.
Bul tarıhı sát Dımash Qudaıbergenniń «Stranger» atty jeke konserti aıasynda oryndaldy. Myńdaǵan kórermen alǵash ret TMD elderinen kelgen ártisti dál osy áıgili sahnada qarsy aldy, - dep habarlaıdy Aqshamnews.kz.
Armandar oryndalady: Madison Square Garden – jańa beles
«Men bala kúnimnen osy jerde óner kórsetýdi armandaıtynmyn. Sebebi Mohammed Álı men Maık Taısonnyń jekpe-jekteri, Trıo tenorlardyń ánderi, Maıkl Djekson, Ýıtnı Húston, Selın Dıon, Andrea Bochellı syndy ańyzdardyń óneri meni shabyttandyratyn», – dedi Dımash konsert qarsańynda.
Bul arman oryndaldy. Dımash bastaǵan Qazaqstandyq komanda áıgili sahnada erekshe baǵdarlama usyndy.
«Stranger» shoýy – stıl men mádenıet toǵysy
Konsert Dımashtyń «Golden» ánimen bastalyp, kóptildi repertýarymen jalǵasty: «Smoke» (aǵylshynsha), «Olımpıko» (ıtalánsha), «Battle of Memory» (qytaısha), al alǵash ret oryndalǵan «Love’s not over yet» kompozısıasyn eki márte «Gremmı» ıegeri Ýolter Afanasev fortepıanomen súıemeldedi.
«Onyń óneri shekaralardy joıyp, ár adamǵa áser etedi. Mundaı energetıka sırek kezdesedi», – dep atap ótti Ýolter Afanasev.
Dımash BUU-nyń kóshi-qon jónindegi agenttiginiń Aımaqtyq izgi nıet elshisi retinde sahnadan adamzatqa úndeý tastady. Ol gýmanıtarlyq kómekti qoldaýǵa shaqyryp, konserttiń bir bóligi qaıyrymdylyqqa arnaldy.
Konserttiń erekshe bóliginde dombyra, sybyzǵy, qobyz sekildi ulttyq aspaptar tanystyrylyp, «Adaı» kúıi oryndaldy. Sondaı-aq, jańa avtorlyq án - týǵan jerge arnalǵan «Samǵaý» kompozısıasynyń premerasy ótti.
«Bul konsert – qazaq óneriniń jańa deńgeıge kóterilgen sáti», – dep pikir bildirdi dombrashylar Temirlan Oljabaı men Ernat Naýryz.
Kesh barysynda «Umytylmas kún», «Give Me Your Love», «Be With Me», «Mahabbat ber maǵan», «Fire», «The Story Of One Sky» sıaqty tanymal týyndylar oryndalyp, tyńdarmanmen birge aıtyldy. Kesh sońynda «Dýrdaraı» áni oryndalyp, Dımash sahnadan kórermendi 8 qazan kúni Meksıkada ótetin kelesi konsertine shaqyrdy.