Seýlde Ortalyq Azıa elderiniń kóktem festıvali ótti.
Festıvál barysynda YouTube-te qazaqsha án salatyn koreıalyq azamat dombyra tartýdy úırenip júrgeni belgili boldy, dep habarlaıdy Almaty-akshamy.kz.
Massaget.kz-tiń málimetinshe, merekede kórermender qazaqtyń ulttyq taǵamdary men oıyndary, kitap jáne mýzykasymen tanysty. Kelgenniń barlyǵy derlik qazaq tilinde jazýlary bar jeıdelerdi tegin aldy. Ashyq aspan astyndaǵy sharaǵa qatysýshylar Nomad qazaq qaýymdastyǵy daıyndaǵan baýyrsaq pen basqa da taǵamdardan dám tatty. Koreıalyqtar tabıǵı ónimderdi jaqsy kóredi, sondyqtan qazaqstandyq óndirýshilerdiń baly tanymal boldy. Balalarǵa toǵyzqumalaq, asyq atý oıyndarymen qazaqsha kitaptar kórsetildi.
Byltyrdan beri jergilikti turǵyndar qazaq ánderin tanı bastady. Bul - koreılyq ánshi Son Von Sobtyń eńbegi. Ol birneshe zamanaýı qazaq shyǵarmalaryn koreı tiline aýdaryp oryndady.
Qazaqstanǵa eki ret jasaǵan sapardan keıin onyń repertýarynda halyq áni paıda boldy.
"Maǵan dombyra syıǵa tartyldy. Qazir men ol aspappen oınaýdy úırenip júrmin. Qazaqstanǵa barǵan soń dombyramen qazaqtyń halyq ánin jazyp alýdy jón kórdim. Kelesi aptada ol meniń repertýarymda paıda bolady", - dedi ánshi Son Von Sob.
Bıyl – Qazaqstan men Koreıa arasyndaǵy mádenı jyl. Sondyqtan ár apta saıyn Koreıanyń qalalarynda qazaq mýzykasy shyrqalady. Kelesi demalys kúnderi Pýsanda qazaq mádenıeti festıvali ótedi. Oǵan elimizden birneshe ansámblmen ártister qatysady.
"Maqsatymyz – koreıalyqtardy mádenıet arqyly Ortalyq Azıa elderi týraly az da bolsa kóbirek bilý. Al qazir bul úshin barlyq jaǵdaı bar. Pandemıadan keıin barlyq salada qarym-qatynastar jaqsardy. Ásirese, týrızm salasynda. Eger buryn Koreıadan Qazaqstan men Ózbekstanǵa ǵana ushatyn bolsa, maýsymda Seýl men Bishkek arasynda tikeleı áýe reısi ashylady. Biz de Seýl-Astana baǵytynyń qaıta jandanatynyna úmittenemiz", - dedi "Koreıa-Ortalyq Azıa" yntymaqtastyq forýmy hatshylyq basshysynyń orynbasary Djı Chan Son.
Qyzdar jaǵy qazaqtyń ulttyq zergerlik buıymdaryna qyzyǵýshylyq tanytty. Al zamanaýı ulttyq kıimderdi dızaıner Aıdana Omarova usyndy. Onyń osy salada júrgenine 10 jyl bolǵan. Dızaınerdiń maqtadan, zyǵyrdan jáne jibekten jasalǵan kıimi AQSH pen Eýropada tanymal. Bul – Aıdananyń Koreıadaǵy alǵashqy kórsetilimi.
"Koleksıalarymyz qazaqy naqyshta, kúndelikti kıip júrýge arnalǵan. Biz qazir taqıalar qosyp jatyrmyz. Al kıimdi kóbine kúndelikti ómirge arnaıylap shyǵaryp jatyrmyz. Sebebi olar óte yńǵaıly, ádemi kez kelgen aq kıimin bolsyn bir tústi kıimnen ústinen kıe salsa kıim óte ádemi bolyp kórinedi", - dedi dızaıner Aıdana Omarova.