Jolaýshylarǵa bılet quny tolyq qaıtarylýda
QAZAQ AIR avıakompanıasy Reseıge barlyq reısterin toqtatty, dep habarlaıdy Almaty-akshamy.kz QazAqparatqa silteme jasap.
Kompanıanyń baspasóz qyzmetinen málim etkendeı, «QAZAQ AIR avıakompanıasy saqtandyrý uıymynan Reseı terıtorıasynda jáne onyń áýe keńistiginde saqtandyrý ótelimi júrgizilmeıtini týraly habarlama aldy. Atalǵan jaǵdaıǵa baılanysty avıakompanıa Reseı terıtorıasy áýesinde saqtandyrý ótelimi týraly másele sheshimin tappaıynsha Reseıge avıareısterdi oryndaýǵa qaýqarsyz. Osy sebepti Novosıbırskige búgingi (12 naýryz) reıs oryndalmaıdy», - dedi mekemeden.
Jolaýshylarǵa bılet quny tolyq qaıtarylýda. Bıletterdi qaıtarý satyp alǵan jerleri boıynsha júzege asyrylyp jatyr. Eger ushý qujaty avıakompanıada satyp alynǵan bolsa, info@flyqazaq.com elektrondy poshtasyna habarlasý qajettigi aıtyldy.
«Aldaǵy kúnderi kestede bolýy múmkin ózgerister týraly jolaýshylardy habardar etip otyramyz. QAZAQ AIR avıakompanıasy ushýlar qaýipsizdigi boıynsha qazaqstandyq jáne halyqaralyq standarttardyń barlyq talabyn oryndap otyr», - dedi kompanıanyń baspasóz qyzmetinen.
Eske salaıyq, 11 naýryz kúni Air Astana kompanıasy Reseıge ushatyn barlyq reısti toqtatty.