Oqýshynyń ata-anasyn jaýapkershilikke tartý úshin ákimshilik is qozǵaldy
Keshe jelide joǵary synyp oqýyshsynyń muǵalimge daýys kóterip, ony balaǵattap jatqan sátiniń vıdeosy taraǵan edi. Bilim jáne ǵylym mınıstrligi atalǵan keleńsiz jaıtqa qatysty búgin túsinik berdi, dep habarlaıdy Almaty-akshamy.kz.
Mınıstrliktiń málimetinshe, muǵalim men oqýshy arasyndaǵy janjal Almaty oblysy Taldyqorǵan qalasyndaǵy №4 mektepte bolǵan.
«11 naýryz kúni bıologıa sabaǵynda 2005 jyly týǵan oqýshy muǵalimmen qatty daýyspen balaǵat sózder aıtyp sóılesken. Muǵalim Taldyqorǵan qalasynyń polısıa bólimine aryz jazǵan. Qazirgi tańda oqýshyǵa qatysty QR ÁQBtK-niń 434-babynyń 1-bóligi (usaq buzaqylyq) boıynsha ákimshilik hattama toltyryldy. Sheshimdi Almaty oblysynyń kámeletke tolmaǵandardyń isteri jónindegi mamandandyrylǵan aýdanaralyq soty qabyldaıdy.
Esterińizge sala keteıik, kámeletke tolmaǵan balalardyń is-áreketteri úshin ata-analardyń jaýapkershiligi qarastyrylǵan»,-delingen habarlamada.
Osy iske baılanysty oqýshynyń ata-anasyn jaýapkershilikke tartý úshin ákimshilik is qozǵaldy. Sonymen qatar belgilengen tártippen oqýshyny esepke qoıý jáne oǵan psıhologıalyq kómek kórsetý týraly másele de qaralady.
«Aıta keteıik, muǵalimderge degen mundaı kózqarasqa jol berilmeıdi. Tek muǵalimder ǵana emes, ata-analar da balalarmen qoǵamda ózin qalaı ustaý keregi týraly áńgimeler júrgizýi mańyzdy»,-delingen habarlamada.