«Álem ádebıeti» endi jeke oqytylady
Orta bilim berý deńgeıindegi «Qazaq tili», «Qazaq ádebıeti» jáne qazaq tilinen basqa tilde oqytatyn synyptarǵa arnalǵan oqý baǵdarlamalaryna tıisti ózgerister engiziletin bolady, dep habarlaıdy Almaty-akshamy.kz
Bul týraly Ortalyq komýnıkasıalar qyzmetinde «Ulttyq rýhanı jańǵyrý» Ulttyq jobasy: negizgi baǵyttar» taqyrybynda ótken brıfıń barysynda QR BǴM Til saıasaty komıtetiniń tóraǵasy Ádilbek Qaba málimdedi.
«Ulttyq joba Memleket Basshysy Qasym-Jomart Toqaevtyń tapsyrmasy boıynsha ázirlenip, qazaqstandyq qoǵamnyń mádenıet, aǵartý jáne ulttyq rýh deńgeıin arttyrýǵa baǵyttalǵan. Negizgi mindet memlekettik tildi damytý úshin jaǵdaı jasaý bolyp tabylady. Bul mindetti oryndaý úshin naqty is-sharalar belgilendi. Osy ýaqytqa deıin «Qazaq ádebıeti» páni mazmunynda «Álem ádebıeti» úlgileri qosa oqytylyp kelse, endi «Álem ádebıeti» jeke oqytylady. «Qazaq ádebıeti» mazmuny tek tól shyǵarmalardy qamtıdy. Qazaq tilin oqytý ádistemesi jetildirilip, qazaq tili muǵalimderiniń biliktiligi arttyrylady. Sonymen qatar qazaq tilinde oqýlyqtar ázirleý, qazaq, orys jáne aǵylshyn tilderinde debattyq týrnırler ótkizý, memlekettik tilde İT ónimder ázirleý, engizý jáne shyǵarý, YouTube vıdeohostınginde qazaq tilindegi tanymal anımasıalyq fılmderdi dýblájdaý jáne ornalastyrý jumystary júrgiziledi», - dedi QR BǴM Til saıasaty komıtetiniń tóraǵasy.
Sonymen qatar qazaq tilindegi oqýlyqtarmen tehnıkalyq jáne kásiptik bilim berý uıymdaryn, joǵary oqý oryndaryn qamtamasyz etý máselelerine toqtaldy. Máselen «Ulttyq rýhanı jańǵyrý» ulttyq jobasyn iske asyrý aıasynda 2025 jylǵa deıin qazaq tilinde kolejderge arnalǵan 700-den astam oqýlyq ázirleý josparlanǵan.