Sheteldikter shekarany kesip ótken sátten bastap baqylaýǵa alynady.
Qazaqstanda «Ýchaske» jalpy profılaktıkalyq is-sharasy barysynda sheteldikterge baqylaý jasalady, dep habarlaıdy Almaty-akshamy.kz
Bul týraly İshki ister mınıstrligi Kóshi-qon komıteti tóraǵasynyń mindetin atqarýshy Aslan Atalyqov brıfıńte málim etti.
«Sheteldikter memlekettik shekarany kesip ótken sátten bastap baqylaýǵa alynady. Tolyq aqparat, tólqujat derekteri, kelý maqsaty, qaı jerde bolý kerektigi birden bizdiń kóshi-qon polısıasynyń aqparattyq júıesine túsedi. Kóshi-qon qyzmetkerleri sheteldikterdiń turǵylyqty jeri men jarıalanǵan maqsatyna sáıkestigin tekserý úshin bul derekterdi kún saıyn ýchaskelik polıseıge beredi», - dedi Aslan Atalyqov.
Onyń aıtýynsha, ishki ister organdarynan basqa, ulttyq qaýipsizdik komıteti, shekara qyzmeti, eńbek jáne halyqty áleýmettik qorǵaý mınıstrligi, densaýlyq saqtaý mınıstrligi de sheteldikterdiń bolýyn, olardyń kelý maqsatyna sáıkestigin baqylaıdy.
Kelýshiler Qazaqstannyń barlyq zańyn saqtaýǵa tıis. Sheteldiktiń is-áreketi memlekettik qaýipsizdikti qamtamasyz etý, qoǵamdyq tártipti qorǵaý, halyqtyń densaýlyǵyn saqtaý, quqyqtaryn qorǵaý jáne Qazaqstan azamattarynyń zańdy múddelerine qaıshy keletin bolsa, sot sheshimi negizinde Qazaqstan Respýblıkasynan shyǵarylýy múmkin.
Sheteldik azamattardyń barlyq sanaty Qazaqstanda 30 kúnge deıin ýaqytsha tirkeýsiz tura alady. Úkimettiń 2012 jylǵy qaýlysyna sáıkes, Eýrazıalyq ekonomıkalyq odaqqa múshe memleketterdiń azamattaryna memlekettik shekarany kesip ótken kúnnen bastap 90 kúnge deıin Qazaqstanda bolýǵa ruqsat etilgen.
Aslan Atalyqovtyń aıtýynsha, jyl basynan beri elimizge 4 mıllıon 399 myń sheteldik kelgen. Osy ýaqyt ishinde 4 mıllıon 155 myń sheteldik ketken.