Asyraýshysynan aırylýyna baılanysty járdemaqy taǵaıyndalady.
2023 jylǵy 28 qazan kúni Kostenko shahtasynda bolǵan apat saldaryn joıý jónindegi jedel shtab otyrysynda Eńbek jáne halyqty áleýmettik qorǵaý mınıstri Svetlana Jaqypova qaza tapqan kenshilerdiń otbasyna qandaı áleýmettik kómek kórsetiletinin aıtty, dep habarlaıdy Almaty-akshamy.kz
Mınıstrdiń sózinshe, qaza tapqan azamattardyń otbasyna asyraýshysynan aırylýyna baılanysty járdemaqy taǵaıyndalady.
"Ol respýblıkalyq búdjetten, áleýmettik saqtandyrý qorynan jáne ómirdi saqtandyrý kompanıasynan tólenedi. Járdemaqy kóleminiń jalpy ortasha mólsheri asyraýyndaǵy adamdar 18 jasqa tolǵanǵa deıin aı saıyn 400-500 myń teńgeden bastalady. Eger balalar joǵary oqý oryndarynda bilim alyp jatqan bolsa, onda 23 jasqa deıin tólenedi", dedi Eńbek jáne halyqty áleýmettik qorǵaý mınıstri Svetlana Jaqypova.
Ol ázirge barlyq tólemdi óteý "ArselorMıttal Temirtaý" kompanıasyna júkteletinin qosa aıtty.
"Kásiporyn ujymdyq shartqa sáıkes jyldyq tólem táýekelderin tóleýge mindetti. "ArselorMıttal Temirtaý" kompanıasy jerleý rásimderine baılanysty barlyq shyǵyndy, sondaı-aq balalardy joǵary oqý oryndarynda oqytýdy óz moınyna alýǵa tıis", – dedi Svetlana Jaqypova.