Budan buryn marqumdardyń aty-jóni jazylǵan tizimdi jarıalaǵanbyz.
QARALY JYR
«Jomart» ken ornyndaǵy úıindi astynan jeti jumysshynyń denesi tabyldy. =aqparattan=
«Jomart» ta meniń aýylym edi,
Baýyrym edi jeti arys.
Qaıǵy kep túrdi taǵy da irgeni,
Qyrsyqtyń bolsyn bet alys.
Qobyz da shalǵan,
Keıde óleń aıtqan,
Saryarqa beli,
saıań nur.
... Joshy qazasyn kúımenen aıtqan
Ketbuǵa babam,
oıan bir!
Biledi deısiń ómiri uqpaǵan,
Ajaldyń mynaý kim syryn?
Jeti qat jerde kómilip qalǵan
Jeti arys,
Jeti qyrshynym!
Eı, Jańaarqam,
kókti jańǵyrtasyń ba,
Opattan oǵlan ozǵasyn...
Ulytaýymnyń tarǵyl tasyna
Taramdap aqqan kóz jasym.
Bir bıik bolyp tursyń, Edige,
Shala da jansar bir kezder...
Kúńgiritteý únmen kúrsinedi me
Kúńgir de kúńgir kúmbezder?!
Taryltqanyń ba,
óristi kúnim,
Shatylmas jerde shatylyp.
Sarysý men Keńgir kóristi búgin.
Aqpannyń aıy ah uryp...
Tórge ozǵandary tóńiregimniń,
Kúıis qaıyrǵan qodastaı...
Janaryn súrtshi,
Meniń elimniń –
Qaıǵydan turǵan kóz ashpaı!
Ǵalym JAILYBAI, aqyn, Halyqaralyq «Alash» ádebı syılyǵynyń laýreaty.