Almaty-akshamy.kz saıtynda búgin jaryq kórgen jańalyqtarǵa sholý – kún kerýeni
Memleket basshysy Qaýipsizdik keńesiniń otyrysyn ótkizdi
Jıyn barysynda Ulttyq qaýipsizdik strategıasyn júzege asyrýǵa baǵyttalǵan negizgi ádis-tásilderdi jandandyrý máseleleri qarastyryldy. Memleket basshysy álemde qalyptasqan kúrdeli geosaıası ahýal jaǵdaıynda talqylanyp otyrǵan problematıka Qazaqstannyń ekonomıkalyq jáne áskerı áleýetin nyǵaıtý turǵysynan zor mánge ıe ekenin atap ótti.
Qaýipsizdik keńesi otyrysynyń qorytyndysy boıynsha ulttyq múddeni qorǵaý jáne ulttyq qaýipsizdikke tónetin qaterlerdi basqarý júıesiniń tıimdiligin arttyrýǵa baǵyttalǵan birqatar sheshim qabyldandy.
Stambýlǵa konsertke barasyz ba?
Ol úshin ne isteý kerek? Dımashtyń 24 mamyrda Stambýlda ótetin jeke konsertine eki bılet alý úshin ánshiniń Almatyda túsirilgen jańa klıpine pikir jazyp, jeńimpaz ataný qajet! Ol oqyrman 10 kún boıy joǵary satyda tursa, Dımashtyń 24 mamyrda Ystanbulda ótetin jeke konsertine eki bılet beriledi. Onyń ishine qonaq úıde turý jáne ushý aqysy da kiredi.
4 balaǵa – 59 183 teńge?
Kópbalaly otbasylarǵa memleketten qandaı kómek beriledi? 2024 jyldyń qańtar aıynda 571,6 myń kópbalaly otbasyna jalpy somasy 38,1 mlrd teńge mólsherinde memlekettik járdemaqy tólengen. Bul memlekettik járdemaqyǵa 4 jáne odan da kóp birge turatyn kámeletke tolmaǵan nemese 23 jasqa deıingi kúndizgi bólimde oqıtyn stýdent balalary bar otbasylar tabysyna qaramastan úmitker bola alady. Bıyldan bastap balaly otbasylarǵa taǵaıyndalatyn memlekettik járdemaqylardyń mólsheri 7%-ǵa artty.
BJZQ-nyń paıdasy qansha?
BJZQ salymshylarynyń 2024 jyldyń birinshi aıyndaǵy taza ınvestısıalyq kirisi 109,6 mlrd teńgeden asty. Bul ótken jyldyń osy kezeńiniń kórsetkishterinen 45,7 mlrd teńge nemese 72% -ǵa artyq.
1998 jyly jınaqtaýshy zeınetaqy júıesi qurylǵan kúnnen bastap ınvestısıalyq kiris 2024 jylǵy 1 aqpanda shamamen 9,5 trln teńge boldy. Al búkil kezeń ishinde jınaqtalǵan ınflásıa 761,15% bolǵanda jınaqtalǵan ınvestısıalyq kiristilik óspeli qorytyndymen 822,03% kórsetti. Osylaısha, uzaq merzimdi kezeńdegi jınaqtalǵan ınvestısıalyq kiris ınflásıadan asyp tústi.
Oqýlyqtardy talqylaýǵa qatysyńyz!
Bıyl aqpannyń 12-sinen bastap jańadan ázirlengen oqýlyqtardyń mazmunyna qoǵamdyq talqylaýlar júrgizilip jatyr. Oqý-aǵartý mınıstrliginiń málimetinshe, talkylau.ebmso.edu.kz saıtynda oqýlyqtar mazmunynyń sapasy, qurylymy, ádistemelik tásilderi, baıandaý tili men bezendirilýine qatysty qoǵam men ǵylymı-pedagogıkalyq qaýymdastyq ókilderi pikirlerin bildire alady. Onda jańadan ázirlengen oqýlyqtar bar.
Úkimettiń hatshysy
Almaty qalasy ákiminiń baspasóz qyzmetiniń basshysy bolyp jumys istegen áriptesimiz Dılára Alenova QR Premer-Mınıstriniń baspasóz hatshysy boldy.
Eńbek jolyn 2014 jyly tilshi bolyp bastady. Ár jyldary QR Prezıdenti janyndaǵy Ortalyq komýnıkasıalar qyzmetinde, QR Aqparat jáne komýnıkasıalar mınıstrligi Aqparat komıtetinde, "Qazkontent" AQ-da, QR Premer-Mınıstriniń baspasóz qyzmetinde, "Almaty qalasynyń óńirlik komýnıkasıalar qyzmeti" KMM basshysy, Almaty qalasy Qoǵamdyq damý basqarmasy Komýnıkasıalyq is-tájirıbeler bóliminiń basshysy, Almaty qalasy ákiminiń baspasóz qyzmetiniń basshysy bolyp jumys istedi.
Poıyz kestesine ýaqyttyń ózgerýi áser ete me?
Kólik mınıstrligi biryńǵaı ýaqyt beldeýine kóshýge qatysty málimdeme jasady. Jolaýshylar anyqtamalyq aqparatty 1433 nómiri boıynsha «Jolaýshylar tasymaly» AQ Biryńǵaı anyqtamalyq qyzmeti arqyly nemese @KTZH_PP_BOT Telegram botynyń kómegimen tegin ala alady.
29 aqpannan 2 naýryzǵa deıin Qazaqstannyń avıasıalyq ákimshiliginiń jedel shtaby bazasynda 8 7172 798214, 8 7172 798213 nómirleri boıynsha «jedel jeli» jumys isteıtin bolady. Sondaı-aq reıs boıynsha ózekti aqparatty naqtylaý úshin jolaýshylar áýejaıdyń anyqtamalyq qyzmetteri men áýe kompanıalardyń Call-ortalyqtaryna habarlasýy kerek:
- Air Astana 8 727 244 44 77, 8 7172 58 44 77, 8 702 702 44 77;
- FlyArystan 8 727 331 1010 (WhatsApp 8 702 702 0227);
- SCAT 8 7252 99 88 80;
- Qazaq Air 8 727 356 14 14.
10 mıllıondyq borysh
Memleketaralyq izdeýde júrgen adamdy Almatyda ustap berdi. Kóshi-qon qyzmetiniń málimetinshe, 10 mıllıon teńgeni tólemegeni úshin memleketaralyq izdeýde bolǵan T.esimdi azamat Qazaqstanǵa kirý kezinde ustaldy, onyń eki jyl boıy shetelde jasyrynyp júrgeni belgili boldy. T.esimdi azamat sot sheshimin odan ári oryndaý úshin jeke sot oryndaýshysyna berildi.
Kóktemniń túsi qandaı?
Sángerler kóktem mezgilindegi basty tústerdiń biri dep jasyldaý kelgen záıtún tústi tańdap otyr, ony kóptegen dızaınerler ózderiniń jańa koleksıalaryna engizip te úlgergen. Stılıster jańa sándi tústi utymdy ári sándi paıdalaný úshin ony basqa tústermen qalaı úılestirýge jáne stıldi beınelerdi qalaı jasaýǵa bolatyndyǵyn aıtty. Záıtún túsi – 2024 jyldyń kóktem maýsymyndaǵy sándi reńk. 2024 jyldyń aqpanynda áıgili Vogue jýrnalynyń fransýz redaksıasy 2024 jyldyń jańa kóktemgi maýsymynda záıtúnniń jasyl túsine basymdyq beriletinin habarlady. Kóptegen brendter ony óz koleksıalaryna engizdi.