Almaty polıseıleri mektepterdi baqylaýda
Almaty polıseıleri mektepterdi baqylap, “dabyl batyrmalarynyń” tıimdiligin tekserýde, dep habarlaıdy Almaty-akshamy.kz Polisia.kz-ke silteme jasap.
Buryn habarlanǵandaı, Almaty qalasyndaǵy jalpy bilim beretin mektepterdiń qaýipsizdik júıeleri polısıaǵa qosylǵan.
«Reseı Federasıasynyń Qazan jáne Perm qalalarynda bolǵan qaıǵyly oqıǵalardy barlyǵy biledi. Balalardyń qaýipsizdigin qamtamasyz etý maqsatynda bilim berý mekemelerinde aldyn alý sharalary kúsheıtildi. Búgingi tańda qaladaǵy barlyq 207 mektepte 4 414 beınebaqylaý kamerasy ornatyldy, onyń 2 620-sy Jedel basqarý ortalyǵyna qosylǵan. Qalǵandary jaqyn arada qosylatyn bolady. Sonymen qatar, bilim berý uıymdaryn tekserý, qalanyń barlyq mektepterinde kúzet agenttigi men JBO-na sıgnal beretin dabyl túımeleri ornatylǵanyn jáne jumys istep turǵanyn kórsetti», – dedi Almaty qalalyq Polısıa departamentiniń bastyǵy Qanat Taımerdenov.
Sondaı-aq, bilim berý mekemeleri dabyl qurylǵylarymen jabdyqtalǵan, olarda daýys zoraıtqysh baılanys júıesi de bar, bilim berý uıymdarynyń ákimshilik ǵımarattaryna kirýdi baqylaý jáne basqarý úshin qondyrǵylar ornatylǵan. Sonymen qatar, 150 mektepke deıingi bilim berý mekemesi beınebaqylaý júıesimen jabdyqtalǵan.
«Qazirgi ýaqytta Almaty qalasy PD basshylyǵynyń tapsyrmasy boıynsha bilim berý uıymdarynyń qaýipsizdik júıelerine keshendi tekserý júrgizilýde. Bizdiń bólimshe qyzmetkerleri “dabyl batyrmalarynyń” jumys isteý qabiletin jáne olardyń iske qosylýyna departamenttiń Jedel basqarý ortalyǵy, sondaı-aq, kúzet agenttiginiń toby qalaı áreket etetinin tekseredi», – dedi Almaty qalalyq PD Jergilikti polısıa qyzmeti basqarmasynyń bastyǵy Manap Sattarov.