Almatyda jyl saıyn 100 myńnan astam áıel skrınıngten ótedi.
28 qańtarda Papanın kóshesi, 220, Lıter A mekenjaıy boıynsha ornalasqan Almaty onkologıalyq ortalyǵynda saǵat 9:00-den 13:00-ge deıin jatyr moıny obyrynyń aldyn alý jáne erte anyqtaý boıynsha Ashyq esik kúni ótedi, dep habarlaıdy Almaty-akshamy.kz
Almaty onkoortalyǵynyń onkogınekologıa bólimshesiniń meńgerýshisi Raıhan Bolatbekovanyń aıtýynsha, gınekologqa júıeli túrde baryp, skrınıngtik tekserýden ótip tursa, jatyr moıny obyrynyń aldyn alýǵa bolady, al eger ol erte satysynda anyqtalsa, ony tolyq emdeýge bolady.
Munda jatyr moıny obyry damýdyń bastapqy kezeńinde eshqandaı belgisi bolmaıtynyn atap ótken jón.
«Sondyqtan tekserýden ótip turý kerek. Bul aýrýdyń belgileri bolmaǵan kezdiń ózinde isikti erte kezeńde anyqtaýǵa múmkindik beredi. Aýrý belgileri paıda bolǵannan keıin isiktiń odan ári taralý múmkindigi týyndaǵan kezde, aýrýdy emdeý kúrdelene túsedi », - dep atap ótti onkolog.
Almatyda jyl saıyn 30 jas pen 70 jas aralyǵyndaǵy 100 myńnan astam áıel jatyr moıny obyryna skrınıngten ótedi.
2022 jyldyń ózinde Almatyda jatyr moıny obyryna skrınıngtik jas tobyna kiretin 74098 áıel tekserildi. Onyń ishinde 21 áıelde jatyr moıny obyry anyqtalsa, taǵy 538 áıelde isik aldy jaǵdaıy anyqtaldy.
21 jaǵdaıdyń bárinde qaterli isik erte kezeńde anyqtalǵany qýantady.
Qala turǵyndary skrınıngti tirkelgen emhanada óte alatynyn taǵy bir eske salamyz.
Jalpy, jatyr moıny obyryn tolyq skrınıngten ótkizý aýrýshańdyqty 80%-ǵa tómendetýge jáne bul aýrýdan bolatyn ólimdi 70%-ǵa tómendetýge múmkindik beredi.
«Qazirgi ýaqytta jatyr moıny obyrynyń 5 jyldyq ómir súrý deńgeıi, barlyq kezeńderdegi anyqtaýdy eskere otyryp, 70% ne odan da kópti qurasa, aýrýdy bastapqy kezeńde anyqtaý kezinde bul kórsetkish 90%-ǵa jetedi», - deıdi Raıhan Bolatbekova.
Aýrýdy der kezinde anyqtaý úkim emes, ómirińizdi saqtap qalý múmkindigi ekenin umytpańyz!