Óndiristegi ólim qaı salada jıi tirkeledi?
QR Kásipodaqtar federasıasynyń tóraǵasy Satybaldy Dáýletalın BAQ ókilderine «Jańa qoǵamdyq kelisim: Ádiletti eńbek qatynastary» atty áleýmettik áriptester forýmynyń aldynda óndiristegi ólim statısıkasyn aıtyp berdi, dep habarlaıdy Almaty-akshamy.kz QazAqparatqa silteme jasap.
«Ókinishke qaraı, eńbek qaýipsizdigi kún saıyn ózekti bolyp keledi. Biz jyl saıyn óndiriste 200 adamnan aıyrylamyz. Bul - jarıalanbaǵan jasyryn soǵys deýge bolady. Onymen kúresýimiz kerek. Bul iste ótemaqy tóleý modelinen táýekelge baǵdarlanǵan modelge nemese adamdardyń qaýipsizdigin qamtamasyz etýge múmkindik beretin aldyn-alý sharalaryna kóshýdi usynamyz», - degen federasıa basshysy jyl saıyn tirkeletin 200 ólimniń qaı salalarda jıi kezdesetinin aıtty.
«Onyń qaı salalarda ekenin aıta alamyn. Birinshi - qurylys salasynda, ekinshi - taý-ken salasynda, onyń ishinde kómir shyǵarý salasynda tirkeledi. Biz jumysshylary óndiris kezinde qaıtys bolǵan kásiporyndarda ózimiz saraptama júrgizgenbiz. Sonda baıqaǵanymyz, mundaı jaǵdaılar kóbinde kásipodaqtary joq jerlerde bolyp jatyr. Ekinshiden, 70 paıyzy dep aıta alamyn, jumys berýshiniń kinásinen bolady. Sondyqtan bul da - bizdiń basa kóńil aýdaratyn máselemiz. Jalpy, jumys berýshi búgingi tańda osy máselege shynaıy kóńil bólip, eskirip qalǵan qural-saımandy ózgertip, eńbek adamyna degen qurmetin kóbeıtpese, jaǵdaı ózgermeıdi», - dedi Satybaldy Dáýletalın.