Zań bárine ortaq.
QR Mádenıet jáne aqparat mınıstri Aıda Balaeva áleýmettik jeli arqyly otandyq óner ókilderiniń qoǵamdyq tártipti buzýlaryna qatysty pikir bildirdi, dep habarlaıdy Almaty-akshamy.kz
Mınıstr sońǵy kezde mádenıet salasyndaǵy belgili azamattarǵa qatysty jaǵymsyz oqıǵalar, keıde tipti zańsyz áreketter jıilep ketkenin aıtqan. Osyǵan baılanysty qoǵamdy qaryshtap ósiretin de, tuqyrtyp óshiretin de – mádenıet ekenin eskertken.
«Mádenıet tek óner men bilim, ozat talǵam pen tazalyk emes. Bul, eń aldymen, adamnyń ishki rýhanıaty, halyqtyń órkenıettik bolmysy. Endeshe, sol mádenıettiń týyn kóterip, ónerdiń tasyn órge domalatyp júrgen árbir maıtalman - elge úlgi, qoǵamǵa baǵdar bolýy shart. Ókinishke oraı, sońǵy kezde mádenıet salasyndaǵy belgili azamattarǵa qatysty jaǵymsyz oqıǵalar, keıde tipti zańsyz áreketter jıilep ketti. Árıne, jeke-dara adam retinde, qarapaıym azamat retinde kimge bolsa da pendeshilik tán qasıet. Adam bolǵan soń qatelesýiń múmkin, biraq onyń arty zańdy attaýǵa barmaýy tıis», deıdi mınıstr.
Ózin naǵyz “mádenıet qaıratkerimin” deıtin jan úshin tanymaldyq zańsyzdyqqa jol beretin qudyret emes degen pikirin de bildirgen. Olardyń qashanda ult mádenıeti damýynyń qozǵaýshy kúshi sanalatynyn atap ótken mınıstr óner maıtalmandarynyń kópke yqpaly tek ónege, nasıhat, jaqsylyqqa arqaý bolýy tıis ekenin eske salǵan.
“Mádenıet qaıratkerleri Zań men Urpaq aldyndaǵy osynaý úlken jaýapkershiligin túsinýi kerek. Bul memleket basshysynyń barsha qazaqstandyqtardan talap etip otyrǵan biregeı úndeýi. Laýazymyna, tanymaldylyǵyna, qoǵamdaǵy ornyna qaramastan, zań bárine ortaq.
Al memleket osy qaǵıdanyń múltiksiz oryndalýyn qamtamasyz etetin bolady, degen A.Balaeva barsha óner adamdaryn Uly Abaıdan beri kele jatqan qoǵamdaǵy nadandyqpen kúrestiń aldyńǵy shebinde mádenıet maıtalmandary júrýi tıis ekenin umytpaýǵa shaqyrdy.