H tobynda Portýgalıa men Ýrýgvaı komandalary kúsh synasty
Qatarda fýtboldan ótip jatqan álem chempıonatynda H tobynda Portýgalıa men Ýrýgvaı komandalary kúsh synasty, dep habarlaıdy Almaty-akshamy.kz QazAqparatqa silteme jasap.
Bul topta birinshi týrda portýgalıalyqtar tartysty machta Ganany 3:2 esebimen utsa, Ýrýgvaı Ońtústik Koreıamen teń oınaǵan edi.
Ekinshi týrda Gana ońtústikkoreıalyqtardy 3:2 esebimen tize búktirip, Portýgalıany qýyp jetti. Degenmen portýgalıalyqtar Ýrýgaıdy jeńse, pleı-ofqa shyǵatyn edi.
Osydan tórt jyl buryn Reseıde ótken chempıonatta 1/8 fınalda qos komanda kezdesip, ýrýgvaılyqtar 2:1 esebimen utyp ketken bolatyn. Sonda Edınson Kavanı qos goldyń avtory atansa, Portýgalıadan Pepe mergendigimen kózge túsken edi. Sol oıynda Krıshtıaný Ronaldý gol soǵa almaı, qapy ketken-di.
Bul joly birinshi taımda bastapqyda portýgalıalyqtar dopqa kóbirek ıelik etkenimen, eshteńe tyndyra almady. Esesine 32-mınýtta ýrýgvaılyq Rodrıgo Bentankýr qos qorǵaýshynyń ortasynan sytylyp shyǵyp, qaqpashy Dıogý Koshtamen betpe-bet keldi. Tek erte umtylyp úlgergen D.Koshta komandasyn goldan aman alyp qaldy.
Ekinshi kezeńde 54-mınýtta sol qaptaldan Brýný Fernandeshtiń Krıshtıaný Ronaldýǵa qaraı asyrǵan doby qaqpadan bir shyqty – 1:0.
Budan keıin ýrýgvaılyqtar tarazy basyn teńestirý úshin baryn saldy. Shabýylshylar Lýıs Sýares pen Maksı Gomes alańǵa tyńnan qosyldy. Sol boıda 75-mınýtta Fakýndo Pelıstrıden pas alǵan M.Gomes qaqyrata soqqan dop qaqpa jaqtaýynan keri qaıtty.
Machtyń aıaqtalýyna sanaýly mınýttar qalǵanda, Brýný Fernandesh alǵa umtylǵanda, ýrýgvaılyq qorǵaýshy Hose Marıa Hımenes qolmen oınady. 93-mınýtta B.Fernandesh 11 metrlik penaltıden múlt ketken joq – 2:0. Budan soń da portýgalıalyqtardyń esepti ulǵaıtyndaı múmkindikteri boldy.
Osylaısha, H tobynda Ýrýgvaıdy 2:0 esebimen tize búktirgen Portýgalıa alty upaı jınap, 1/8 fınalǵa joldama aldy. Ganada úsh, Ýrýgvaı men Ońtústik Koreıada bir-birden upaı bar. 2 jeltoqsan kúni Gana – Ýrýgvaı, Ońtústik Koreıa – Portýgalıa quramalary ózara kezdesedi.
Buǵan deıin Fransıa men Brazılıa quramalary merziminen buryn pleı-off kezeńine shyqqan edi.
Sonymen, Qatardaǵy dúnıejúzilik dodada ekinshi týr oıyndary máresine jetti.