Qasym-Jomart Toqaev, eń aldymen, kezekten tys ótken Prezıdent saılaýyndaǵy jeńisimen quttyqtaǵan jıynǵa qatysýshylarǵa alǵys aıtty, dep habarlaıdy Almaty-akshamy.kz.
– Qazaqstannyń aımaqtaǵy odaqtastarymen jáne seriktesterimen aradaǵy dostyqty, tatý kórshilikti jáne ózara tıimdi yntymaqtastyqty jan-jaqty nyǵaıtý jónindegi strategıalyq baǵyty ózgermeıtinin atap ótkim keledi. Biz aldaǵy ýaqytta da sizderdiń memleketterińizben ekijaqty jáne kópjaqty formattaǵy qarym-qatynastardyń joǵary deńgeıin saqtaýǵa kúsh salamyz, – dedi Prezıdent.
Memleket basshysy UQSHU aıasyndaǵy yntymaqtastyqtyń túrli baǵytyna qatysty elimizdiń ustanymyn jetkizdi. Uıymǵa múshe elder basshylarynyń qorytyndy kezdesýi kúrdeli geosaıası qaıshylyqtar men buryn-sońdy bolmaǵan syn-qaterler jaǵdaıynda ótip jatqanyn aıtty.
– Halyqaralyq isterde kúsheıe túsken turaqsyzdyq UQSHU keńistigin de aınalyp ótken joq. Bizdiń aımaqta búkil Eýrazıa keńistigindegi turaqtylyqqa, qaýipsizdikke nuqsan keltiretin janjaldar áli de jalǵasyp jatyr. Mundaı jaǵdaıda ashyq, shynaıy, konstrýktıvti dıalogty saqtaý jáne damytý óte mańyzdy. Bul – kúrdeli daǵdarystar men qaıshylyqtardan shyǵýdyń tıimdi ári ońtaıly joly, – dedi Qasym-Jomart Toqaev.
Prezıdent armán-ázerbaıjan qaqtyǵysyn dıplomatıalyq jolmen retteýge baǵyttalǵan sharalardy qoldady.
– Armenıa men Ázerbaıjan arasyndaǵy qarym-qatynastyń qalpyna kelýine bárimiz de múddelimiz. Reseı tarapynyń bitimgerlik áreketteri armán-ázerbaıjan qaqtyǵysyn tek saıası-dıplomatıalyq jolmen sheshýge jáne eki jaqtyń beıbit kelisimge qol qoıýyna múmkindik beredi dep úmittenemiz, – dedi Memleket basshysy.
Qasym-Jomart Toqaev Aýǵanstandaǵy jaǵdaıǵa arnaıy toqtaldy.
– Bul memlekettegi jaǵdaıdy retteý joldaryn qarastyrý – UQSHU-nyń ońtústik shekaralaryndaǵy qaýipsizdikti qamtamasyz etýdiń negizgi faktorlarynyń biri. Qazaqstan osy eldiń ózekti áleýmettik-ekonomıkalyq máselelerin sheshý úshin Aýǵanstan basshylyǵymen ózara yntymaqtastyqty jalǵastyrýǵa nıetti. Biz Aýǵanstanǵa gýmanıtarlyq kómek kórsetip kelemiz, – dedi Prezıdent.
Memleket basshysy uıym aıasyndaǵy is-áreketti odan ári damytýǵa baılanysty birqatar usynys aıtty. Sonyń ishinde UQSHU-nyń bitimgerlik áleýetin damytý máselesin jýyq aradaǵy basymdyq retinde atap ótti.
Qasym-Jomart Toqaev sózin qorytyndylaı kele armán tarapyna jáne Nıkol Pashınánǵa UQSHU tóraǵasy retindegi tabysty jumysy úshin alǵys aıtyp, Belarýs Prezıdenti Aleksandr Lýkashenkonyń 2023 jyly atqaratyn tóraǵalyǵyna sáttilik tiledi.
Josparlanǵan rotasıa aıasynda memleketter basshylary Qazaqstan ókili Imanǵalı Tasmaǵambetovti 2023 jyldyń 1 qańtarynan bastap úsh jyl merzimge UQSHU Bas hatshysy qyzmetine taǵaıyndaý týraly sheshim qabyldady.