Qazaqstan Prezıdentiniń baspasóz hatshysy Rýslan Jeldibaı Memleket basshysynyń keshegi Sochıge jumys sapary jaıly pikir bildirdi, dep habarlaıdy Almaty-akshamy.kz Inform.kz-ke silteme jasap.
«Prezıdent Qasym-Jomart Toqaev Sochıde uzaqqa sozylǵan jeke kezdesýdegi kelissózdiń qorytyndysyna kóńili tolatynyn jetkizdi. Memleket basshysynyń pikirinshe, kelissóz ózara senim ári iskerlikpen erekshelengen aıyryqsha dostyq atmosferada ótti. Prezıdent saýda-ekonomıkalyq, ınvestısıalyq jáne gýmanıtarlyq yntymaqtastyqqa, eki eldiń halyqaralyq arenadaǵy ózara is-áreketine qatysty barlyq máseleler jan-jaqty talqylanǵanyn atap ótti. Memleket basshylary óz deńgeıindegi ýaǵdalastyqtardy eki el úkimetteriniń turaqty túrde júzege asyrýy mańyzdy dep túsinedi» dep jazdy Rýslan Jeldibaı Facebook paraqshasynda.
Aıtýynsha, Prezıdentter turaqty jumys baılanysyn jalǵastyrýǵa kelisken.
Qasym-Jomart Toqaev Vladımır Pýtınge qurmeti men qonaqjaılyǵy úshin shynaıy rızashylyǵyn bildirdi.
Eske sala keteıik, keshe Sochı qalasynda Qazaqstan Prezıdentin Vladımır Pýtın qoshemetpen kútip alyp, ekijaqty kezdesý ótkizdi.
Kezdesý 2,5 saǵatqa sozyldy.
Basqosýda Qazaqstan Prezıdenti Qazaqstan men Reseı arasyndaǵy yntymaqtyń bolashaǵy týraly pesımısik boljamdarǵa eshqandaı negiz joq ekenin atap ótti.
«Geosaıası ahýaldyń ereksheligi saǵattarymyzdy salystyryp, tekserýdi qajet ekenin meńzeıdi. Bálkim Úkimetterge qosymsha tapsyrma berý kerek bolatyn shyǵar. Olar bir-birimen tabysty jumys istep, ózara áreket etip jatyr. Sonda da ómir sheshimin tabýdy qajet etetin jańa mindetter qoıyp otyr. Jalpy aradaǵy seriktestiktiń damýyna qanaǵattanýǵa barlyq negiz bar. Bul turǵyda sizben kelisemin. Bizdi álemdegi eń uzyn qurlyqtyq tolyq shegendelgen shekara biriktirip tur. Sondyqtan, árıne, bolashaǵymyzǵa qatysty pesımısik boljam aıtýǵa eshqandaı negiz joq», - dedi Memleket basshysy.
Prezıdent, sondaı-aq eki el arasyndaǵy jan-jaqty yntymaqty damytýǵa múddeli ekenin atap ótti.
Sondaı-aq Qasym-Jomart Toqaev Reseı basshysyn TMD samıtine shaqyrdy.
Óz kezeginde Reseı basshysy Qazaqstan Prezıdenti Qasym-Jomart Toqaevtyń shaqyrýyn qabyl alyp, Sochıge kelgenine alǵysyn jetkizdi.
Qasym-Jomart Toqaev Sochı qalasyndaǵy «Sırıýs» bilim berý ortalyǵyna bardy.