Memleket basshylary álemdik jáne óńirlik kún tártibindegi ózekti máseleler boıynsha pikir almasty.
Memleket basshysy Qasym-Jomart Toqaev QHR Tóraǵasy Sı Szınpınmen telefon arqyly sóılesti, dep habarlaıdy Almaty-akshamy.kz Akorda.kz saıtyna silteme jasaı otyryp.
Eki el basshylary joǵary deńgeıdegi turaqty, senimdi dıalog jan-jaqty, uzaq merzimdi dáıekti strategıalyq áriptestiktiń kepili ekenin aıtty. Taraptar 2019 jyldyń qyrkúıek aıynda Qazaqstan Prezıdentiniń Qytaı Halyq Respýblıkasyna jasaǵan memlekettik sapary barysynda qol jetkizilgen mańyzdy ýaǵdalastyqtardyń júzege asyrylýyna kóńilderi tolatynyn jetkizdi.
Qasym-Jomart Toqaev eki el arasyndaǵy dıplomatıalyq qatynastarǵa 30 jyl tolatynyn atap ótip, qarqyndy damyp kele jatqan ekijaqty baılanystardy joǵary baǵalady. Qazaqstan men Qytaı arasyndaǵy qarym-qatynastardyń qazirgi jaǵdaıy kez kelgen syn-qaterge tótep bere alatyn jáne úlgi tutarlyq deńgeıde ekeni aıtyldy.
«Qytaı – bizdiń máńgi kórshimiz ári dosymyz. Bizdiń beıbitshilik pen jan-jaqty yntymaqtastyqqa negizdelgen ortaq shekaramyz bar. COVID-19 indeti taralǵan kúrdeli kezeńde ózara qoldaý kórsetkenimiz – myzǵymas dostyqtyń aıqyn úlgisi», – dedi Qasym-Jomart Toqaev.
Prezıdent jýyrda Qazaqstanǵa «CoronaVac» vaksınasynyń alǵashqy leginiń jetkizilgenin aıtyp, Qytaı tarapyna rızashylyǵyn bildirdi. Bul elimizde júrgizilip jatqan jalpyulttyq vaksınalaý naýqanyna aıtarlyqtaı úles qosady.
Sı Szınpın ekijaqty strategıalyq áriptestikke jáne kúrdeli kezeńde kórsetilgen ózara kómekke qatysty Qazaqstan Prezıdentiniń bergen baǵasyn quptady.
«Elderimiz arasyndaǵy yntymaqtastyqtyń formaty biregeı sıpatta jáne Qytaıdyń basqa kórshi eldermen qarym-qatynasy mundaı deńgeıde emes», – dedi Qytaı basshysy.
QHR Tóraǵasy «Bir beldeý – bir jol» tarıhı bastamasyn iske asyrýdaǵy Qazaqstannyń róline erekshe toqtalyp, koronavırýs pandemıasynyń kesirinen jahandyq baılanystardyń úzilgen shaǵynda jobanyń óz qajettigin dáleldegenin aıtty.
Qasym-Jomart Toqaev Qazaqstan terıtorıasy arqyly ótetin kólik-tranzıt baǵdarlaryn odan ári ártaraptandyrý baǵytyndaǵy elimizdiń berik ustanymyn naqtylady. Prezıdent Qazaqstan men Qytaı shekarasyndaǵy avtokólikter men temirjol ótkizý beketteriniń jumystaryn, sondaı-aq, eki el arasyndaǵy turaqty áýe qatynastaryn tezirek qalypty jaǵdaıǵa keltirý qajet ekenin aıtty. Bul qadam eki eldiń isker toptary men jalpy jurtshylyǵy úshin asa jaǵymdy jańalyq bolar edi.
Memleket basshysy «Bir beldeý – bir jol» tujyrymdamasynyń basqa da baǵyttaryn birlesip ilgeriletýde ınovasıalyq, atap aıtqanda, qarjy, sıfrlandyrý jáne «jasyl» tehnologıalarǵa qatysty sheshimderdi izdestirýge shaqyrdy.
Qasym-Jomart Toqaev pen Sı Szınpın eki el úkimetterine áńgime barysynda kóterilgen máselelerdi egjeı-tegjeıli pysyqtaýdy qolǵa alý jóninde tapsyrma berýge ýaǵdalasty.
Memleket basshylary álemdik jáne óńirlik kún tártibindegi ózekti máseleler boıynsha pikir almasty. Olar BUU, SHYU jáne «Ortalyq Azıa – Qytaı» formaty sıaqty kópjaqty alańdardaǵy ózara is-qımyldardyń zor áleýeti bar ekenin atap ótti. Eki el basshylary jańa dáýir kezeńinde mýltılateralızm tujyrymdamasyn jáne «Adamzattyń ortaq taǵdyry» qoǵamdastyǵyn qurýdyń asa qajet ekenin aıtty. Qazaqstan Prezıdenti Azıadaǵy ózara yqpaldastyq jáne senim sharalary jónindegi keńeske únemi qoldaý kórsetip kele jatqany úshin qytaı tarapyna rızashylyǵyn bildirdi.
Qasym-Jomart Toqaev Sıan qalasynda ótken Ortalyq Azıa elderi Syrtqy ister mınıstrleri kezdesýiniń qorytyndylaryna joǵary baǵa berdi. Sondaı-aq halyqaralyq yqpaldastyqtyń atalǵan formatynyń damýyna atsalysýǵa daıyn ekenine toqtalyp, kezekti otyrysty 2022 jyly Qazaqstanda ótkizýdi usyndy.
Sı Szınpın Qazaqstan Ortalyq Azıadaǵy iri memleket retinde aımaqtaǵy qaýipsizdik pen turaqtylyqty qamtamasyz etýde, ásirese, Aýǵanstannan Amerıka áskeri shyǵarylǵannan keıin mańyzdy ról atqara alady dep sanaıdy.
Ózara senimge jáne tolyq qoldaýǵa negizdelgen áńgimelesý sońynda Qasym-Jomart Toqaev pen Sı Szınpın ártúrli deńgeıdegi tyǵyz qarym-qatynastardy jalǵastyrýǵa ýaǵdalasty. Sonymen qatar uıymnyń 20 jyldyǵyna oraı Qazaqstan astanasynda SHYU-ǵa múshe memleketter úkimetteri basshylarynyń otyrysyn laıyqty deńgeıde ótkizýge kelisti. QHR basshysynyń Qazaqstanǵa memlekettik saparmen kelý merzimin dıplomatıalyq joldar arqyly kelisý jóninde ýaǵdalastyqqa qol jetkizildi.