Memleket basshysynyń tóraǵalyǵymen Qazaqstan Respýblıkasynyń Prezıdenti janyndaǵy Sheteldik ınvestorlar keńesiniń kezekten tys otyrysy beınebaılanys rejıminde ótti.
Jıynǵa Prezıdent Ákimshiliginiń basshylyǵy, Úkimet músheleri, memlekettik organdardyń ókilderi, iri transulttyq jáne ulttyq kompanıalardyń jetekshileri qatysty, dep habarlaıdy Almaty-akshamy.kz Aqordanyń resmı resýrsyna silteme jasap.
Kezdesýge qatysýshylar adamı kapıtaldy kúsheıtýge, ekonomıka men ınvestısıalyq saıasatqa ekologıalyq, áleýmettik jáne korporatıvtik basqarýdyń standarttaryn engizýge basa mán bere otyryp, elimizdiń ınvestısıalyq tartymdylyǵyn jaqsartý jóninde birqatar usynys aıtty.
Memleket basshysy qaıǵyly qańtar oqıǵasyna nazar aýdara otyryp, der kezinde qabyldanǵan batyl sheshimderdiń arqasynda elimizdegi jaǵdaıdyń tolyq turaqtanǵanyn atap ótti. Qasym-Jomart Toqaev halyqaralyq qaǵıdattarǵa tolyq saı keletin tergep-tekserý jumystarynyń jalǵasyp jatqanyn málimdedi.
Sondaı-aq Prezıdent qańtar oqıǵasy ınvestorlarǵa belgili bir deńgeıde jaısyzdyq týǵyzǵanyn aıtty.
«El Prezıdenti retinde sheteldik ınvestorlar úshin «ashyq esik» saıasaty bizdiń strategıalyq basymdyǵymyz bolyp qala beretinin aıtqym keledi. Memleket seriktester men ınvestorlar aldyndaǵy mindettemeleri men kepildikterin tolyq oryndaıdy. Qańtar daǵdarysy naryqtyq ekonomıkaǵa, zań ústemdigine, halyqaralyq jáne ishki mindettemelerdi saqtaýǵa degen beıildigimizge esh áser etken joq. Kerisinshe, bul odan ári jetildirýge tyń serpin berdi», – dedi Prezıdent.