QR Prezıdenti Qasym-Jomart Toqaev Saýd Arabıasynyń isker toptar ókilderimen ótken ınvestısıalyq dóńgelek ústelge qatysty. Bul týraly Almaty-akshamy.kz Inform.kz-ke silteme jasap habarlady.
Prezıdent jıynǵa qatysýshylarǵa iltıpat bildire otyryp, memleketterimizdiń keleshek ekonomıkalyq damýǵa degen kózqarastary uqsas ekenin atap ótti.
– «Saudi Vision-2030» baǵdarlamasy men bizdiń «Qazaqstan-2050» strategıasy ekonomıkany ártaraptandyrý, shıkizatqa táýeldilikti tómendetý, adamı kapıtalǵa ınvestısıa salý, túptep kelgende, joǵary damyǵan elderdiń qataryna kirý arqyly ulttyq damýǵa qol jetkizýdi kózdeıdi, – dedi Memleket basshysy.
Prezıdent Saýd kásipkerlerine Qazaqstannyń ekonomıkalyq jetistikteri týraly málimet berdi.
– Táýelsizdik jyldary Qazaqstannyń ishki jalpy ónimi 17 ese ósti. Búginde Qazaqstan ekonomıkasy Ortalyq Azıadaǵy barlyq ózge elder ekonomıkasynyń jıyntyq kóleminen asyp túsedi. Ortalyq Azıadaǵy taýar aınalymynyń 60 paıyzǵa jýyǵy Qazaqstanǵa tıesili. Elimizdiń halyqaralyq rezervi – 90 mıllıard dollar jáne TMD boıynsha jan basyna shaqqanda eń joǵarysy sanalady. Sheteldik ınvestorlar elimizdiń ekonomıkasyna 380 mıllıard dollardan astam qarjy quıdy. Bul Ortalyq Azıa aımaǵyna salynǵan jalpy ınvestısıanyń 70 paıyzyn quraıdy, – dedi Qasym-Jomart Toqaev.
Memleket basshysy yntymaqtastyqty keńeıtýdiń meılinshe perspektıvti salalaryn belgilep berdi.
– Biz júrgizgen taldaýǵa sáıkes Qazaqstan mashına jasaý, shoıyn jáne bolat óndirisi, sondaı-aq tamaq ónerkásibi men aýyl sharýashylyǵy sıaqty salalar boıynsha quny shamamen jylyna 400 mıllıon dollar bolatyn shıkizat taýarlarynyń 100-den astam túrin usyna alady, –dedi Prezıdent. Qasym-Jomart Toqaev Qytaı, Qazaqstan, Ázerbaıjan, Grýzıa jáne Túrkıa arasyn jalǵastyratyn kólik-tranzıt jáne logıstıkalyq múmkindikterdi, sonyń ishinde Transkaspıı baǵdaryn ártaraptandyrýdy jáne keńeıtýdi ekinshi mańyzdy baǵyt retinde atap ótti. Onyń pikirinshe, yntymaqtastyqtyń mol áleýetin ekonomıkanyń naqty sektorynda da paıdalanýǵa bolady.
– Qazaqstan álemde vólfram qory boıynsha 1-oryn, ýran men hrom boıynsha 2-oryn alady, al marganes, kúmis, myrysh, qorǵasyn baılyǵy boıynsha alǵashqy bestikke kiredi. Bul qorlardy barlap, zertteý kerek. Qarqyndy damyp kele jatqan Qytaı men Ońtústik Azıa naryǵyna jaqyndyǵymyzdy eskere otyryp, ınvestısıa salýǵa, shyn máninde, bul jaqsy múmkindik. Búgin biz barlaý jáne ázirleme jumystary úshin baǵaly jáne tústi metaldyń 60-tan astam ken ornyn usyna alamyz, – dedi Memleket basshysy.
Qazaqstan men Saýd Arabıasynyń munaı hımıasy, atom energetıkasy, jasyl sýtegi óndirisi salalaryn damytý, ǵaryshty zertteý jóninde jáne basqa da baǵyttar boıynsha jospary bar.
– Biz Koróldiktiń Saudi Vision-2030 strategıasy aıasynda óziniń ǵaryshtyq baǵdarlamasyn damytýǵa degen nıetin qoldaımyz. Elderimizdiń ǵarysh keńistigin zertteý jáne beıbit maqsatta paıdalaný salasyndaǵy yntymaqtastyq úshin tıisti quqyqtyq bazasy bar. Qazaqstannyń aeroǵarysh salasyn damytý úshin tájirıbesi de, áleýeti de jetkilikti. Bizdiń kompanıalarymyz osy salalar boıynsha Saýd Arabıasynyń memlekettik jáne jeke kompanıalarymen ózara yntymaqtastyq ornatýǵa daıyn, – dedi Qasym-Jomart Toqaev.
Prezıdent otandyq agrosektordyń áleýetine de toqtaldy.
– Qazaqstan egistik kólemi boıynsha jan basyna shaqqanda álemde ekinshi, jaıylymdyq jerler jóninen besinshi oryn (180 mıllıon gektar) alady. Elimiz bıdaı ósiretin jáne un óndiretin 10 iri memlekettiń qataryna kiredi. Biz Koróldikke joǵary sapaly bıdaı, un jáne maıly daqyldardy turaqty ári uzaq merzimdi jetkizýshi elderdiń biri bolýǵa daıynbyz, – dedi Qasym-Jomart Toqaev.
Qasym-Jomart Toqaev Qazaqstanda ınvestorlar úshin zamanaýı ınstıtýsıonaldyq orta qalyptasqanyn eske saldy.
– Osy múmkindikti paıdalana otyryp, Qazaqstannyń Saýd Arabıasymen aradaǵy ekijaqty yntymaqtastyqty nyǵaıtýǵa jáne keńeıtýge beıildi ekenin rastaǵym keledi. Búgin osynda búkil álemde aıtarlyqtaı tabystarǵa qol jetkizgen Saýd Arabıasynyń iri kompanıalarynyń basshylary qatysyp otyr. Men bárińizdi ózara tıimdi negizde Qazaqstanda birlese jumys isteýge shaqyramyn, – dedi Qazaqstan Prezıdenti.