Prezıdent Qasym-Jomart Toqaev Koreıa Respýblıkasynyń Prezıdenti Mýn Chje Inmen kelissózder júrgizdi
Ońtústik Koreıa Prezıdentiniń rezıdensıasynda resmı delegasıa músheleriniń qatysýymen Memleket basshysy Qasym-Jomart Toqaev pen Prezıdent Mýn Chje In kelissózder ótkizdi dep habarlaıdy almaty-akshamy.kz akorda.kz silteme jasap.
Taraptar qazaq-koreı strategıalyq áriptestigin odan ary damytýdyń perspektıvalaryn jan-jaqty talqylady. Saýda-ekonomıkalyq, ınvestısıalyq jáne mádenı-gýmanıtarlyq baılanystardy nyǵaıtýǵa erekshe kóńil bólindi.
Sonymen qatar memleketter basshylary ǵalamdyq jáne aımaqtyq ózekti máselelerdi qarastyryp, halyqaralyq qurylymdardaǵy ózara yntymaqtastyqty talqylady.
Qasym-Jomart Toqaev Prezıdent Mýn Chje Inge koreı jerinde kórsetilgen qurmet pen qonaqjaılyǵy úshin rızashylyǵyn bildirdi.
Memleket basshysy 2019 jyly Nur-Sultan qalasynda ótken kezdesýdiń qazaq-koreı qarym-qatynasyna tyń serpin bergenin aıtty.
Qasym-Jomart Toqaev Ońtústik Koreıa Qazaqstannyń Azıadaǵy eń mańyzdy strategıalyq áriptesi ekenin atap ótti.
– Búgingi tańda Qazaqstannyń ekonomıkasyna 6 mlrd dollardan astam koreılik ınvestısıa tartylǵan. Investısıa tartý isin budan bylaı da jalǵastyra berý kerek dep oılaımyn. Men osydan eki jyl buryn ózara baılanystarymyzdy arttyrý úshin aýqymdy joba qurý kerek ekenin Sizge aıtqanmyn. Qazir Qazaqstanda koreıalyqtar qarjy salǵan 550 kompanıa jumys istep jatyr. Olardyń arasynda Samsung, Hyundai, Lotte, Posko jáne taǵy basqalary bar. Óte jaqsy ınstıtýsıonaldy baza qalyptasqan, úkimetaralyq komısıa men iskerlik keńes jumys istep jatyr, – dedi Qazaqstan Prezıdenti.
Memleket basshysy koreıalyq áriptesine koronavırýspen kúreste kórsetken gýmanıtarlyq kómegi úshin alǵys aıtyp, qazaqstandyq QazVac vaksınasy týraly aqparatpen bólisti.
Qasym-Jomart Toqaev Ońtústik Koreıanyń joǵary tehnologıalar men densaýlyq saqtaý salasyn damytý tájirıbesine qyzyǵýshylyq tanytty.
Ońtústik Koreıa Prezıdenti pandemıa bastalǵaly beri osyndaı joǵary deńgeıdegi kezdesýdi eń birinshi bolyp Qazaqstan Prezıdentimen ótkizip jatqanyn atap ótti.
– Sizdi kóp kútken asa qadirli qonaq retinde kútip alǵanyma qýanyshtymyn. Bizdiń kezdesýimizdiń Qazaqstan Táýelsizdiginiń 30 jyldyǵy men Koreı Respýblıkasy Táýelsizdiginiń 76 jyldyǵy qarsańynda ótip jatqany asa mańyzdy, – dedi Prezıdent Mýn Chje In.
Ońtústik Koreıa Prezıdenti Mýn Chje In Qasym-Jomart Toqaevqa jáne Qazaqstan halqyna Koreıanyń ulttyq batyrlary, el táýelsizdigi úshin kúresken Ge Bon Ý, Hvan Ýn Dena jáne general Hon Bon Donyń súıekterin tarıhı Otanyna jetkizýge yqpal etkeni úshin rızashylyǵyn bildirdi.
Koreı basshysy aımaqtyq jáne halyqaralyq úderisterde Qazaqstannyń asa mańyzdy ról atqaratynyn atap ótti.
– Qazaqstan Táýelsizdik alǵannan keıin syrtqy saıasatta ashyq ári tyǵyz baılanys ornatyp, belsendilik tanytý arqyly Ortalyq Azıadaǵy qyrqyndy damýshy memleketke aınaldy. Sonymen qatar Qazaqstan Azıadaǵy ózara yntymaqtastyq jáne senim sharalary jónindegi keńes arqyly jáne Dúnıejúzilik saýda uıymyndaǵy mınıstrler konferensıasynyń teńtóraǵasy retinde de kópjaqty yntymaqtastyqtyń ártúrli tetikterinde belsendi kóshbasshylyq tanytyp keledi. Qazaqstan Koreıa Respýblıkasynyń Ortalyq Azıadaǵy eń alǵashqy saýda jáne ınvestısıalyq áriptesi. Elderimiz arasyndaǵy dıplomatıalyq baılanystar ornaǵan 30 jyl ishinde bizdiń qatynasymyz tek qana dostyq pen yntymaqtastyqqa negizdeldi. Tipti, pandemıa kezinde de biz barlyq deńgeıde syrttaı baılanys ornatyp otyrdyq. Qazaqstan Koreıanyń «Jańa soltústik saıasat» memlekettik strategıasynda asa mańyzdy áriptes. Bizdiń ózara yntymaqtastyǵymyzdyń áleýeti bunymen de bitpeıdi dep esepteımin, – dedi Ońtústik Koreıa Prezıdenti.
Mýn Chje In eki eldi baılanystyratyn erekshe qarym-qatynastardy atap ótti.
– Koreı halqynyń Qazaqstan halqyna degen yqylas-peıili erekshe. Biz úshin Qazaqstan Eýrazıa qurlyǵynyń ortalyǵy bolyp sanalady. Bizdiń halyqtarymyzdyń tarıhı baılanysy sonaý Uly Jibek jolynan tartyp, keıingi etnıkalyq koreılerdi Qazaqstanǵa jer aýdarýmen jalǵasty. Biz Qıyr Shyǵystan jer aýdarylyp barǵan koreılerdi óziniń ystyq qushaǵyn jaıyp qarsy alǵan qazaq halqynyń keń peıildigin eshqashan umytpaımyz, alǵysymyz sheksiz, – dedi Ońtústik Koreıa Prezıdenti.
Kelissózderdiń qorytyndysy boıynsha memleketter basshylarynyń qatysýymen birqatar ekijaqty qujatqa qol qoıyldy:
1. Qazaqstan Respýblıkasy men Koreıa Respýblıkasynyń Birlesken málimdemesi (aýyzsha qabyldandy);
2. Qazaqstan Respýblıkasynyń Mádenıet jáne sport mınıstrligi men Koreıa Respýblıkasynyń İshki ister jáne qaýipsizdik mınıstrligi arasyndaǵy muraǵat isi salasyndaǵy ózara túsinistik týraly memorandým;
3. Qazaqstan Respýblıkasynyń Saýda jáne ıntegrasıa mınıstrligi men Koreıa Respýblıkasynyń Saýda, ındýstrıa jáne energetıka mınıstrligi arasyndaǵy ózara túsinistik týraly memorandým;
4. Qazaqstan Respýblıkasy Ekologıa, geologıa jáne tabıǵı resýrstar mınıstrligi men Koreıa Respýblıkasynyń Qorshaǵan orta mınıstrligi arasyndaǵy sý resýrstaryn basqarý salasyndaǵy ózara túsinistik týraly memorandým;
5. Qyzylorda oblysy ákimdigi men Koreıa Respýblıkasynyń Ardagerler men patrıottar jónindegi agenttigi arasyndaǵy ózara túsinistik týraly memorandým;
6. «Samuryq-Qazyna» UÁQ» AQ men Koreıa halyqaralyq saýda qaýymdastyǵy (KITA) arasyndaǵy yntymaqtastyq týraly memorandým.