Memleket basshysy bokstan álem chempıonatynyń júldegerlerin qabyldady
Prezıdent Qasym-Jomart Toqaev bokstan Ózbekstannyń Tashkent qalasynda ótken álem chempıonatynyń jeńimpazdary – Sanjar Táshkenbaı, Mahmud Sabyrhan, Aslanbek Shymbergenov, Nurbek Oralbaı jáne kúmis medal ıegeri Dýlat Bekbaýovty, sondaı-aq bokstan Qazaqstan ulttyq quramasynyń músheleri men bapkerlerin qabyldady.
Memleket basshysy sportshylardy álem chempıonatyndaǵy jarqyn jeńisimen shyn júrekten quttyqtap, bul kúlli elimiz úshin aıtýly oqıǵa ekenin atap ótti.
– Álemdik jarysta tórt altyn, bir kúmis medal alý – zor jetistik. Qazaq jigitteri álem chempıony atanyp, elimizdiń mereıin ósirdi. Osy múmkindikti paıdalana otyryp, barlyq jankúıerlerge alǵysymdy bildiremin. Olardyń daýysy sonaý Tashkent tórinen anyq estildi. Dál osyndaı shynaıy qoldaý sportshylarymyzǵa aıryqsha kúsh bergeni sózsiz. Sport dodasyn búkil halqymyz kórdi, sizderge tilekshi boldy dep aıtsaq, artyq bolmaıdy. Men de fınaldaǵy jekpe-jekterdi túgel kórdim. Jigitterimiz el namysyn qorǵaý úshin bar kúshin salyp aıqasty. Jelbiregen kók týymyzben jáne ánuranymyzben birge halqymyzdyń rýhy kóterildi. Ulttyń asqaq rýhy jáne otanshyldyq qasıeti degenimiz – osy! Óıtkeni sportshylarymyzdyń árbir jeńisi eldi qanattandyrady. Shyn máninde, ótken jeksenbi qazaq boksynyń asyǵy alshysynan túsken kún boldy. Muhıttyń ar jaǵynda Jánibek Álimhanuly chempıondyq ataǵyn abyroımen qorǵady. Onyń jeńisti joly Tashkentte jalǵasty. Osynyń bári barsha qazaqtyń mereıin tasytty, – dedi Prezıdent.
Memleket basshysy qazaq sportynyń jańa beleske kóterilip kele jatqanyna nazar aýdardy.
– Shahmatshy Bıbisara Asaýbaeva blısten álem chempıony atandy. Tenısshi Elena Rybakına bedeldi týrnırlerde qatarynan birneshe ret top jardy. Balýandarymyz, onyń ishinde qyzdarymyz da bar, Azıa chempıonatynda 7 altyn medal aldy. Nurǵısa Ádiletuly aýyr atletıkadan Azıa chempıony boldy. Fýtbolshylarymyz, hokeıshilerimiz jaqsy nátıje kórsetip júr. Árıne, sportta jeńis te, jeńilis te bolady. Degenmen bizdiń sportshylarymyz bıik belesterdi baǵyndyryp keledi. Buǵan bapkerler men basqa da sport mamandarynyń zor eńbek sińirgeni anyq. Barshańyzǵa shynaıy rızashylyǵymdy bildiremin, – dedi Qasym-Jomart Toqaev.
Prezıdent elimizde sport salasyn damytýǵa aıryqsha mán beriletinin, jastardyń jappaı sportpen aınalysýyna qajetti jaǵdaı jasalatynyn aıtty.
Memleket basshysy sózin qorytyndylaı kele, sportshylarǵa sáttilik tilep, aldaǵy baıraqty básekelerde el namysyn laıyqty qorǵaıtynyna senim bildirdi. Sondaı-aq Qazaqstan boks federasıasynyń basshylyǵyna, sportshylar men bapkerlerge Qazaqstan Respýblıkasy Prezıdentiniń Alǵys hattary men Qurmet gramotalaryn tabys etti.