Búgin 2001 jyly 11 qyrkúıekte Nú-Iork qalasynda bolǵan terrorlyq aktiden qaza tapqandardy eske alý kúni. Osyǵan oraı Memleket basshysy Qasym-Jomart Toqaev Qazaqstannyń terorızmge qarsy kúres jónindegi jahandyq is-qımyldardy qoldaıtynyn naqtylady. Bul týraly QR Prezıdentiniń baspasóz hatshysy Berik Ýálı Facebook-tegi paraqshasynda jazdy, dep habarlaıdy Almaty-akshamy.kz.
«Búgin biz de búkil álemdi dúr silkindirgen AQSH tarıhyndaǵy eń qaraly kúnderdiń biri – 2001 jyldyń 11 qyrkúıegindegi terrorlyq akt qurbandaryn eske alamyz. Jalpy adamzatqa qarsy jasalǵan osy jantúrshigerlik oqıǵa búkil álemdegi mıllıondaǵan adamdardyń jadynda berik saqtalǵan. Qazaqstan álemdik qoǵamdastyqtyń terorızmge qarsy is-qımyldaryn túbegeıli qoldaıdy. Qaýipsizdik pen turaqtylyqty qamtamasyz etý – Qazaqstan strategıasynyń jáne AQSH-pen strategıalyq seriktestigimizdiń negizgi ustanymy», – dep jazdy Memleket basshysy óziniń Twitter paraqshasynda.