Ekijaqty kelissózderden keıin Memleket basshysy men Gvıneıa-Bısaý Prezıdenti buqaralyq aqparat quraldarynyń ókilderi úshin birlesken málimdeme jasady, dep habarlaıdy aqshamnews.kz
Qasym-Jomart Toqaevtyń aıtýynsha, Ýmarý Sısoký Embalonyń Qazaqstanǵa resmı sapary alys jatqan elderdi baılanystyryp, halyqtarymyzdyń tilegi men nıeti bir ekenin kórsetedi.
– Ekijaqty kezdesýdiń nátıjesinde tıimdi ýaǵdalastyqtarǵa qol jetkizdik. Bul sapar saıası, saýda-ekonomıkalyq, mádenı-gýmanıtarlyq jáne basqa da salalardaǵy yntymaqtastyqty odan ári nyǵaıtýǵa múmkindik beredi. Mysaly, kólik-logıstıka salasynyń áleýetin tolyq paıdalanýǵa eki el de múddeli. Osy rette Batys Afrıkadaǵy Bısaý porty men Transkaspıı kólik dálizin ushtastyrý joldaryn zerdeleýge kelistik. Álemdegi geosaıası ahýal men azyq-túlik qaýipsizdigi máselesi ýshyǵyp turǵan qazirgi kezde munyń mán-mańyzy aıryqsha, – dedi Qazaqstan Prezıdenti.
Qasym-Jomart Toqaev aýyl sharýashylyǵy salasyndaǵy seriktestik kelissózderdegi basty taqyryptyń biri bolǵanyn aıtty. Taraptar Qazaqstannyń Gvıneıa-Bısaýǵa dándi daqyldy eksporttaýǵa qatysty múmkindigi mol ekenine nazar aýdarǵan.
– Bul rette elimizdiń bastamasymen qurylǵan Azyq-túlik qaýipsizdigi jónindegi ıslam uıymynyń áleýetin tolyq paıdalanýǵa bolady. Sonymen qatar taý-ken jáne tabıǵı resýrstardy ıgerý isindegi yntymaqtastyq máselesin talqyladyq. Atap aıtqanda, temir, fosfat, boksıt jáne basqa da sırek kezdesetin mıneral kenishterin barlaý jáne ıgerý úshin birlese jumys isteýge zor múmkindik bar, – dedi Memleket basshysy.
Prezıdent elimizdiń sıfrlandyrý, kıberqaýipsizdik jáne fınteh baǵytyndaǵy jetistikterine toqtalyp, sıfrlyq qyzmet salasyndaǵy yqpaldastyqty arttyrýdy usynǵanyn jetkizdi. Sonymen qatar Gvıneıa-Bısaý delegasıasyn kelesi jyly ótetin Astana halyqaralyq forýmyna shaqyrǵanyn aıtty.
– Bul Qazaqstannyń ekonomıkalyq jáne ınvestısıalyq áleýetimen tolyq tanysýǵa múmkindik beredi. Azamattarymyz bir-birin jaqyn tanyp, bilýi úshin mádenı-gýmanıtarlyq baılanystyń mańyzy zor. Osy rette men Gvıneıa-Bısaý jastaryna Qazaqstannyń joǵary oqý oryndarynda bilim alýdy usyndym. Bul qadamdar eki el arasynda jan-jaqty yntymaqtastyqty jandandyrýǵa yqpal eteri sózsiz, – dedi Qasym-Jomart Toqaev.
Taraptar halyqaralyq máseleler jóninde pikir almasyp, oı bólisken. Qazaqstan Prezıdenti qos memlekettiń kóptegen ózekti taqyryptar boıynsha ustanymdary uqsas ekenin málimdedi.
– Ásirese, jahandyq beıbitshilik pen óńirlik turaqtylyqty saqtaýǵa qatysty kózqarasymyz ortaq. Qazirgi geosaıası jaǵdaıda Birikken Ulttar Uıymy men Afrıka Odaǵy aıasynda ózara qoldaý kórsetý jáne konsýltasıalar ótkizý asa mańyzdy. Jalpy, jan-jaqty qarym-qatynasty nyǵaıtýǵa mol múmkindik bar. Búgingi mańyzdy kelisimder – sonyń aıqyn kórinisi. Ýmarý Embalo myrzanyń sapary Qazaqstan men Gvıneıa-Bısaý arasyndaǵy yntymaqtastyqqa tyń serpin beredi dep sanaımyz, – dedi Memleket basshysy.
Óz kezeginde Ýmarý Sısoký Embalo Qazaqstan men Gvıneıa-Bısaý arasyndaǵy yntymaqtastyqty nyǵaıtý perspektıvasyna nazar aýdardy.
– Elderimizde tabıǵı resýrstardy barlaý, bilim berý salalary men kómirsýtegin eksporttaý boıynsha yqpaldastyqty jandandyrýǵa qajetti mehanızm bar. Sonymen qatar Sizdermen túrli halyqaralyq alańdarda qarym-qatynas jasap, kópqyrly baılanysymyzdy ilgeriletýge múddelimiz, – dedi Gvıneıa-Bısaý Prezıdenti.