Halqymyz eshqashan amanatqa qıanat jasamaǵan.
Prezıdent Qasym-Jomart Toqaev bılik partıasynyń kezekten tys sezine qatysty, dep habarlaıdy Almaty-akshamy.kz Aqordanyń baspasóz qyzmetine silteme jasap.
Qasym-Jomart Toqaev sóz basynda barsha qazaqstandyqtardy Alǵys aıtý kúnimen quttyqtady.
«Biz osyndaı yntymaqtyń arqasynda qańtardaǵy qıyn-qystaý kúnderde memlekettigimiz ben tutastyǵymyzdy qorǵap qaldyq. Táýelsizdigimizge tóngen qaterdiń betin qaıtardyq. Syn saǵatta birligin saqtaı bilgen barsha otandastarymyzǵa zor rızashylyq bildiremin. Uıymdy jańǵyrtý týraly alqaly jıynnyń dál búgin ótýiniń sımvoldyq máni bar. Birinshi naýryz – partıanyń qurylǵan kúni. 23 jyl buryn elimizdegi eń basty saıası uıymnyń negizi qalandy. Partıa halyqty ortaq maqsatqa jumyldyrdy. Qoǵamǵa paıdaly kóptegen bastamalar kóterip, saılaýshylardyń qoldaýyna ıe boldy», – dedi Prezıdent.
Memleket basshysy partıanyń keleshegi jóninde aıta kelip, onyń buǵan deıin atqarǵan jumysyn umytýǵa bolmaıtynyna, óz isine berilgen partıa belsendileriniń qajyrly eńbegine qurmetpen qaraý kerek ekenine toqtaldy.
Prezıdent elimizdiń «Jańa Qazaqstandy» qurý jónindegi aýqymdy mindetti oryndaýǵa kiriskenin málimdedi. Aldymyzda memleketimizdiń bolashaq taǵdyryn sheshetin asa mańyzdy jumys tur. Ony oıdaǵydaı júzege asyrý úshin jańa maqsat-mindetterimizdi aıqyndap alýymyz qajet. Partıa barlyq reformaǵa uıytqy bolýǵa tıis.
«Saıası uıymnyń ataýyn Amanat dep ózgertý usynyldy. Jasyratyn eshteńe joq, men de bul máselege baılanysty pikirtalasqa qatystym. Birneshe usynys boldy, sonyń ishinen Amanat degen ataýǵa toqtadyq. Bul – elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qıanat jasamaǵan. Partıa bul qaǵıdatty berik ustanady. «Amanat» ata-babalarymyzdyń keleshek urpaqqa qaldyrǵan ósıeti degen uǵymdy bildiredi. Amanat sóziniń – maǵynasy tereń, halqymyzdyń tarıhy men mádenıetinde erekshe oryn alady. Ol babalarymyz ósıet etken táýelsizdiktiń máńgi arman-muraty, qýatty memlekettiliktiń jáne jalpyulttyq tutastyqtyń, keń-baıtaq Otanymyzdyń qundylyǵy retinde sıpattalady. Biz osy baǵa jetpes muramyzdy saqtap, nyǵaıtýǵa tıispiz. Bul – bizdiń aǵa býyn men óskeleń urpaq aldyndaǵy qasterli boryshymyz. Sondyqtan men partıamyzdy resmı túrde Amanat dep ataýdy tolyq qoldaımyn», – dedi Qasym-Jomart Toqaev.
Prezıdent ótken aıda júrgizilgen aýqymdy analıtıkalyq jumystar partıa qyzmetine mańyzdy ózgerister engizý qajet ekenin kórsetti dep atap ótti. Joǵaryda aıtylǵan usynystardy qoldaı otyryp, partıa Tóraǵasy birqatar basym mindetti aıqyndap berdi. Onyń pikirinshe, eń aldymen, ortalyqqa táýeldilikti joıý jáne partıa apparatynyń tıimdiligin arttyrý qajet.
«Partıa apparatynyń jumysynda búrokratıanyń teris sıpattary anyq kórindi. Jelilik kesteler, esep berý jáne qaǵaz júzindegi is-sharalar saılaýshylarmen tikeleı jumys isteýdi ekinshi orynǵa syrǵytty. Jumysqa qulshynyp turǵan azamattar óz oryndaryn darynsyz fýnksıonerlerge berýge májbúr boldy. Sondyqtan ortalyq apparattyń fılıaldarmen jáne bastaýysh partıalyq uıymdarmen ózara is-qımyl ádisterin tolyǵymen qaıta qaraý qajet. Búrokratıa men qaǵazbastylyqtan úzildi-kesildi bas tartý kerek. Aımaqtyq fılıaldar men bastaýysh uıymdary saılaýshylarmen ózdiginen jumys isteı alady jáne jumys isteýge mindetti. Ortalyq apparat nusqaýshylyq jáne «qolmen» basqarý tájirıbesinen arylýǵa tıis», – dedi Memleket basshysy.
Qasym-Jomart Toqaevtyń aıtýynsha, Májilis pen máslıhattardaǵy fraksıalardyń qyzmetin jandandyrý qajet. Depýtattyq fraksıalar dıalog alańdaryn uıymdastyrý mindetin ózderine alyp, olardyń jumys qorytyndysy boıynsha naqty nátıjege qol jetkizýi kerek.
«Áleýmettik jeliler men qala alańdaryndaǵy qoǵamdyq talqylaýlardy Parlament pen máslıhattarda ótkizgen jón. Bul – asa mańyzdy mindet. Fraksıalar depýtattyq saýaldarmen shektelip qalmaı, parlamenttik jáne qoǵamdyq talqylaýlar men ashyq pikir-saıystarǵa barýǵa tıis. Kerek bolsa, Úkimettiń naqty músheleri men ákimderge senim máselesin kóterý qajet. Barlyq deńgeıdegi partıa depýtattarynyń reıtıńi aldyn ala daıyndalǵan esepterge emes, naqty ister men azamattardyń máselelerin sheshýge negizdelýi kerek», – dedi partıa Tóraǵasy.
Memleket basshysy azamattardyń múddelerin ilgeriletýdi jáne partıanyń ashyqtyǵyn basty másele retinde aıqyndady.
«Partıa popýlızmge salynyp, oryndalmaıtyn ýáde bermegeni jón. Sonda Premer-Mınıstr men kabınet múshelerinen qajetti sandardy talap etýge de jol berilmeıdi. Eger osylaı jalǵasa berse, kúdik kúsheıip, adamdardyń partıaǵa degen senimi joǵalady. Al onyń partıaǵa keri áseri tıedi. Bundaı kózboıaýshylyqtyń saldary adamdardyń áleýmettik kóńil-kúıine jáne ishki saıası turaqtylyqqa yqpal etedi. Buǵan, ásirese, geosaıası turaqsyzdyq jaǵdaıynda jol berýge bolmaıdy. Saılaýshylarmen keri baılanysty kúsheıtken jón jáne osy baǵytta qoǵamdyq qabyldaýlardyń áleýetin barynsha paıdalaný qajet», – dedi Prezıdent.
Partıa Tóraǵasy elimizdi odan ári jańǵyrtý úshin partıalastarynan tyń usynystar kútetinin atap ótti. Sondyqtan jalpyulttyq ózekti máseleler kún tártibin ázirleý úshin Qazaqstannyń árbir azamatynan tyń ıdeıalar men usynystar jınaý jóninde respýblıkalyq aksıa uıymdastyrǵan jón. Memleket basshysy partıalastardyń ishinen senimdi adamdardy iriktep, olardy ilgeriletý isin jalǵastyrǵan durys dep sanaıdy.
«Ashyǵyn aıtqanda, qazirgi kezde saıası menedjerlerdi daıarlaý isi aqsap tur. Qazirgi jaǵdaıda saıası basshylar túrli mamandarmen, jastarmen, jýrnalısermen, halyqtyń barlyq ókilderimen til tabysa alýy kerek. Mundaı adamdar el arasynda az emes. Áleýmettik lıftiniń joqtyǵy – birden-bir kedergi. Jas ári qabiletti mamandarǵa múmkindik bermeımiz. Bul – bizdiń basty kemshiligimiz. Partıa qurylymynda Saıası menedjment akademıasy bar. Osy akademıanyń qyzmetin kúsheıtý qajet», – dedi Prezıdent.
Prezıdent osy aıtylǵan mindetterdi meılinshe qysqa merzim ishinde oryndaý qajet ekenine nazar aýdardy. Partıa Tóraǵasy ortalyq apparatqa jumys tobyn quryp, partıanyń jańa tuǵyrnamasyn ázirleýdi tapsyrdy. Onyń aıtýynsha, Amanat – ozyq oılaý men ádildiktiń, birlik pen alǵa ilgerileýdiń partıasy, halyqtyń pikiri men el múddesin eskeretin azamattarymyzdyń ıgiligi jolynda qyzmet etetin negizgi uıym. Ýkraınada bolyp jatqan qazirgi jaǵdaıda osy aıtylǵan barlyq máseleniń máni zor.
«Bizdiń ustanymymyz memleketimizdiń qaýipsizdigin, egemendigi men aýmaqtyq tutastyǵyn qamtamasyz etýdi kózdeıdi. Biz 2010 jyly Eýropadaǵy qaýipsizdik jáne yntymaqtastyq uıymynyń samıtin ótkizgen el retinde eýrazıalyq qaýipsizdiktiń tutastyǵy qaǵıdatyna beıildimiz. Men bul týraly 10 aqpanda Máskeýge jasaǵan saparymda aıttym. Biz eki memleketti kelissóz ústelinde ortaq til tabysýǵa, ýaǵdalastyq pen kelisimge kelýge shaqyramyz. Basqa jol joq. Jaqsy janjaldan jaman bitim artyq. Beıbitshiliksiz damý bolmaıdy», – dedi Memleket basshysy.
Qasym-Jomart Toqaevtyń pikirinshe, Qazaqstan, qajet bolsa, deldaldyq qyzmettermen qosa, barlyq kómek túrlerin kórsetýge daıyn.
«Men Qaýipsizdik Keńesiniń birqatar otyrysyn ótkizdim. Sanksıalyq qarsylyqtyń buryn-sońdy bolmaǵan shıelenisýi jaǵdaıynda Úkimetke eldiń turaqty áleýmettik-ekonomıkalyq damýyn qamtamasyz etý jóninde naqty mindetter júktedim. Bizdiń ekonomıkamyz daǵdarys jaǵdaıynda úzdiksiz jumys isteýdi qamtamasyz etý úshin sanksıalyq syn-qaterlerge qarsy turýǵa daıyn bolýy kerek. Aldaǵy qıyndyqtar men synaqtardy bárimiz birge eńseremiz dep oılaımyn. Olardyń kúrdeliligin baǵalamaýǵa nemese asyra kórsetýge bolmaıdy», – dedi Prezıdent.
Qasym-Jomart Toqaev eldiń qaýipsizdigi men halyqtyń ál-aýqatyn qamtamasyz etý úshin qoldan kelgenniń bárin jasaýǵa ýáde berdi.
