Qasym-Jomart Toqaevtyń BUU Bas Assambleıasy 78-sessıasynyń aıasyndaǵy ekijaqty kelissózder baǵdarlamasy Majarstan Prezıdenti Katalın Novakpen kezdesýden bastaldy
Memleket basshysy baýyrlas halyqtar arasynda tarıhı jáne mádenı baılanystarǵa negizdelgen strategıalyq seriktestik ornaǵanyn atap ótti.
Prezıdent Majarstannyń túrki yntymaqtastyǵyn nyǵaıtýdaǵy belsendi ustanymyn jáne eleýli úlesin joǵary baǵalady.
Qasym-Jomart Toqaev bıyl qarasha aıynda Qazaqstanda Túrki memleketteri uıymynyń mereıtoılyq 10-sammıti ótetinin aıtyp, atalǵan jıynǵa Majarstan Premer-mınıstri Vıktor Orban qatysady dep josparlanyp otyrǵanyn jetkizdi.
– Elimizdiń Majarstanmen tyǵyz yntymaqtastyq ornatqanyn atap ótkim keledi. Elderimiz arasynda óte senimdi, dástúrli baılanys qalyptasqan. Biz ekijaqty yntymaqtastyqtyń qazirgi deńgeıin joǵary baǵalaımyz. Osy sátti paıdalanyp, Sizdi Qazaqstanǵa saparmen kelýge shaqyramyn. Sonymen qatar Túrki memleketteri uıymynyń samıtinde Premer-mınıstr Vıktor Orban myrzamen kezdesemiz dep úmittenemin, – dedi Memleket basshysy.
Kelissóz barysynda taraptar saýda-ekonomıkalyq, ınvestısıalyq jáne mádenı-gýmanıtarlyq salalardaǵy yntymaqtastyq máselelerin talqylady.
Memleket basshysy eki el arasyndaǵy baılanystardy nyǵaıtý maqsatynda Astana kósheleriniń birine Majarstannyń ult aqyny Shandor Petefıdiń esimi beriletinin aıtty.
Prezıdentter memleketterimiz arasyndaǵy ózara taýar aınalymyn ulǵaıtýǵa baǵyttalǵan birlesken sharalar qabyldaý, sondaı-aq yntymaqtastyqtyń ekijaqty tetikterin jandandyrý mańyzdy ekenin atap ótti.
Taraptar halyqaralyq máseleler, onyń ishinde jahandyq turaqtylyq pen ornyqty damýdy qamtamasyz etý úshin kópjaqty ınstıtýttardyń jumysyn jetildirýge qatysty sharalar jóninde pikir almasty.