Memleket basshysy halyqqa óziniń beıneúndeýin joldady.
Prezıdent bul halyqtyń kóp jylǵy talap-tileginen týyndap otyrǵanyn aıtty, dep habarlaıdy Almaty-akshamy.kz QR Prezıdentiniń teleradıokeshenine silteme jasap.
"Azamattarymyz memleketti basqarý isine qatysýǵa keń múmkindik berilgenin qalaıdy. Sondaı-aq saıası úderisti túbegeıli demokratıalandyrý qajet dep sanaıdy. Muny tıimdi júzege asyrý úshin Ata zańymyzǵa ózgerister engizý qajet.
Bir sózben aıtqanda, konstıtýsıalyq reforma jasaý kerek. Osyǵan oraı meniń tapsyrmammen arnaýly jumys toby quryldy. Oǵan belgili quqyqtanýshy ǵalymdar, tájirıbeli sarapshylar jáne quzyrly organdardyń ókilderi kirdi", - dedi Prezıdent Qasym-Jomart Toqaev.
Jumys toby Negizgi zańǵa engiziletin ózgerister men tolyqtyrýlardyń jobasyn ázirledi. Ol muqıat zerdelep, Konstıtýsıalyq keńeske joldandy.
"Bul organ óz qorytyndysyn usyndy. Qujat jobasy Ata zań normalaryna saı keledi. Biz konstıtýsıalyq reformanyń sheshýshi kezeńine qadam bastyq. Endi Negizgi zańdy ózgertýimiz kerek. Shyn máninde, munyń el taǵdyry úshin aıryqsha máni bar.
Ata zań baptarynyń úshten biri ózgeredi. Ashyǵyn aıtsaq, Konstıtýsıamyz múlde jańa sıpatqa ıe bolady. Sol sebepti, men respýblıkalyq referendým ótkizý týraly bastama kóterdim. Óıtkeni, mundaı aýqymdy ózgeris búkil halyqtyń sheshimimen júzege asyrylýǵa tıis", - dedi Memleket basshysy.