Qasym-Jomart Toqaev Ózbekstanǵa jumys sapary barysynda Prezıdent Shavkat Mırzıóevpen birge ejelgi Hıýa shaharynyń tarıhı ortalyǵyndaǵy «Ishan-qala» qalashyǵyna bardy, dep habarlaıdy almaty-akshamy.kz Aqordanyń baspasóz qyzmetine silteme jasap.
«Ishan qala» IýNESKO-nyń Dúnıejúzilik muralar tizimine Ortalyq Azıadan engen alǵashqy eskertkish sanalady. Memlekettik tarıhı-arheologıalyq mýzeı-qoryǵynda 400-ge jýyq turǵyn úı ǵımaraty, sondaı-aq alpysqa tarta tarıhı jáne sáýlet eskertkishi ornalasqan.
Memleketter basshylarynyń qalashyqqa ekskýrsıasy «Ata darbaza» qaqpasynan bastaldy. Mártebeli meımannyń qurmetine oraı ózbek halqynyń án-kúıi shyrqalyp, teatrlandyrylǵan kórinis qoıyldy.
Odan ári olar «Kýná Ark» keshenin, Sherǵazy han medresesin, Muhammed ámın Inaq medresesin, Juma meshitin jáne «Tash haýlı» keshenin aralap kórdi.
Qazaqstan men Ózbekstan prezıdentteri Hıýanyń ortaǵasyrlyq shaıyry, aǵartýshy, sopy ári oıshyl Palýan Mahmud (1247-1326) kesenesine zıarat jasap, onyń rýhyna Quran baǵyshtady. Palýan Mahmud kesenesi ózbek, túrikmen, qaraqalpaq jáne basqa da halyqtardyń minájat etip baratyn qasıetti mekeni sanalady.
Sondaı-aq Qasym-Jomart Toqaev pen Shavkat Mırzıóev horezm sáýlet óneriniń biregeı eskertkishi – Nurolla baı saraıyna bardy.
Saraı-saıabaq keshenin XIX ǵasyrdyń bas kezinde II Muhammed Rahym han óziniń uly – han taǵynyń murageri Asfendıarǵa arnap, hıýalyq baı kópes Nurollanyń ıeligindegi úlken baqtyń ornyna saldyrǵan. Qurylysqa hıýalyq sheberler men sýretshilerden bólek, Reseıden jáne Germanıadan mamandar aldyrǵan. Dástúrli shyǵys sáýleti óneri men eýropalyq stıldiń ádemi úılesimi nysannyń kelbetinen de kórinip turady.
Eki el basshylary Hıýa handyǵynyń bas ýáziri bolǵan Seıit Ibragım qojanyń úıin, «Besh haýlı» keshenin, saraıdaǵy basqa da bólmelerdi, qonaq kútetin úı-jaılardy aralap kórdi.
Sodan soń prezıdentter «Ózbek-qazaq sýretshileriniń týyndylaryndaǵy halyqtar birligi» beıneleý óneri kórmesin, «XIX-XX ǵasyrlarda túsirilgen fotosýretterdegi Horezm» kórmesin, sonyń ishinde ózbek ulttyq fotoóneri men derekti kınosynyń negizin qalaýshy Qudaıbergen Dıýanovtyń sýretterin tamashalady.