«City» emhanasynyń jańa fılıaly Astananyń qarqyndy damyp kele jatqan aýdanynda ornalasqan. Bul nysanda 30 myńǵa deıin pasıent tirkele alady. Sondaı-aq munda halyqqa alǵashqy dárigerlik kómekten bastap keshendi dıagnostıka men konsýltasıaǵa deıingi qyzmetter kórsetiledi, dep habarlaıdy almaty-akshamy.kz.
Jobanyń ınvestory, «Olymp Medical Group» JSHS bas dırektory Erlan Súleımenovtiń aıtýynsha, bul City emhanalar jelisiniń úshinshi fılıaly. Elordanyń Nura jáne Almaty aýdandarynda eki fılıal jumys istep jatyr. Taǵy da úsh nysan kelesi jyly paıdalanýǵa berilmek.
Emhananyń taǵy bir ereksheligi onda mammologıalyq ortalyq ashylady. Naýqastar munda keshendi dıagnostıkadan ótip, sút bezi aýrýlarynan emdele alady. Medısınalyq ortalyqta tomosıntezi bar sıfrlyq mammografıa, dástúrli jáne vakýmdyq aspırasıalyq bıopsıa ádisteri, hırýrgke qaterli isikterdi alyp tastaý jolyn kórsetetin lokalızasıalyq ıneler ornatý sıaqty dıagnostıkalyq tehnologıalar qoldanylady. Sonymen qatar emhanada barlyq qajetti quraldarmen jabdyqtalǵan ambýlatorıalyq hırýrgıa ortalyǵy ashylmaq.
Astana qalalyq Qoǵamdyq densaýlyq saqtaý basqarmasynyń basshysy Álıa Rústemovanyń aıtýynsha, qazirgi ýaqytta elordanyń sol jaǵalaýynda ambýlatorıalyq kómek berý isi kenjelep qalǵan. Qosymsha taǵy 5 emhana ashý kerek. Halyq sanynyń udaıy ósip kele jatqanyn eskersek, medısınalyq mekemelerge degen qajettilik áli de arta beredi. Bul máseleni sheshýde memlekettik-jekemenshik seriktestik belsendi qoldanylady. Bes jyl ishinde Astana qalasynyń ákimdigi 3 memlekettik emhana salynady jáne 12 jeke emhana ashylady dep josparlap otyr.