Elimizde túrli mádenıet dástúrleri jalpyulttyq biregeıliktiń berik irgetasy bolyp qalanatyn ózimizge tán aıryqsha ómir súrý salty qalyptasty. Bul týraly Qazaqstan halqy Assambleıasynyń HHHİİ sesıasynda Memleket basshysy Qasym-Jomart Toqaev aıtty, dep habarlaıdy almaty-akshamy.kz
«Dańqty otandastarymyzdy, sportshylarymyzdy, mádenıet qaıratkerlerimizdi, ǵalymdarymyz ben stýdentterimizdi, kásipkerlerimizdi shyqqan tegine qaramastan, shetelde únemi qazaqtar dep ataıdy. Bul – tabıǵı qubylys. Solaı bolýy tıis. Bizdiń qoǵam – ortaq ıdealdar men qundylyqtar biriktirgen erkin ári jaýapkershiligi mol azamattardyń odaǵy. Bul – jalpyulttyq biregeıligimizdiń taǵy bir jarqyn kórinisi», - dedi Memleket basshysy.
Prezıdent sondyqtan búginde azamattarymyzdyń barlyǵy ózderin úlken ári birtutas qazaq otbasynyń, shyn máninde, qazaq ultynyń múshesi sezinetinin basa aıtty.
«Biz bárimiz – bir otbasymyz. Bul – artyq aıtqandyq emes. Bul – bizdiń shynaıy bolmysymyz. Osy rette biz maqtanysh etetin etnomádenı áralýandyǵymyz eshqaıda joǵalyp ketpeıdi. Kerisinshe, birtutas azamattyq negiz esebinen nyǵaıa túsedi. Elimizde túrli mádenıet dástúrleri jalpyulttyq biregeıliktiń berik irgetasy bolyp qalanatyn ózimizge tán aıryqsha ómir súrý salty qalyptasty. Osynaý erekshe biregeıligimiz ýaqyt tezine tótep berip, qoǵamdyq sananyń ózegine aınaldy», - dedi Qasym-Jomart Toqaev.