Kógildir tólqujatymyz ben kók týymyz – tarıhtyń ózinen týyndaǵan jáne mıllıondaǵan adamdardyń júreginde shynaıy jaýap týdyratyn bizdiń biregeıligimizdiń naqty nyshandary. Bul týraly Qazaqstan halqy Assambleıasynyń HHHİİ sesıasynda Memleket basshysy Qasym-Jomart Toqaev aıtty, dep habarlaıdy Almaty-akshamy.kz. QazAqparat-qa silteme jasap.
«Shynaıy demokratıa sózben emes, is júzinde ulttyń údemeli ilgerileýi men azamattyq ıdeıasyn nyǵaıtý úshin eń qolaıly jaǵdaı jasaıdy. Táýelsizdik jyldary bizde jańa jalpyulttyq biregeılik qalyptasty dep senimdi túrde aıta alamyz. Ol neden kórinedi jáne onyń rámizderi qandaı? Bul suraqqa jaýap berý úshin jasandy ıdeologıalyq tujyrymdamalardy ázirleýdiń, ınterpretasıamen jáne tolǵanyspen aınalysýdyń qajeti joq. Negizinde bári betinde jatyr. Kógildir tólqujatymyz ben kók týymyz – tarıhtyń ózinen týyndaǵan jáne mıllıondaǵan adamdardyń júreginde shynaıy jaýap týdyratyn bizdiń biregeıligimizdiń naqty nyshandary. Bizdiń tólqujatymyz adamǵa etnıkalyq tegine, dinı kózqarastaryna, áleýmettik mártebesine qaramastan, Qazaqstan Respýblıkasynyń azamattyǵyna baılanysty quqyqtar men mindetterdiń tolyq kólemin beredi», - dedi Memleket basshysy.
Prezıdenttiń paıymynsha, Qazaqstannyń tólqujatyna ıe bolý degenimiz - eldiń halyqaralyq arenasynda qurmetti azamat bolý, barlyq elderge kedergisiz barý jáne ózin qazirgi álemniń ajyramas bóligi retinde seziný.
Bul árqashan jáne barlyq jerde óz memleketiniń qorǵaýynda bolýdy sezinýdi bildiredi.
«Qazaqstan pasporty bizdiń birligimiz ben kelisimimiz negizdelgen progresıvti qundylyqtardy bildiredi. Óz kezeginde Qazaqstannyń aspan tústes kók Týy bizdiń qasıetti táýelsizdigimiz ben ǵasyrlar boıǵy memlekettiligimizdi aıqyn beıneleıdi. Bizdiń Týymyz eń iri halyqaralyq sporttyq jarystarda jáne basqa da osyndaı is-sharalarda joǵary kóterilgen saıyn árqashan óz elimiz úshin maqtanysh sezimine ıe bolamyz», - dedi Qasym-Jomart Toqaev.