Basty maqsatymyzdyń biri – qoǵamda órkenıetti saıası dástúrdi ornyqtyrý. Ol úshin joǵary saıası jaýapkershilik mádenıetin qalyptastyrýymyz kerek. Prezıdent Qasym-Jomart Toqaev Parlament Senatynyń otyrysynda osyndaı pikir bildirdi, dep habarlaıdy Aqordanyń baspasóz qyzmeti.
QR Prezıdenti konstıtýsıalyq reforma elimizdiń saıası júıesin evolúsıalyq jolmen damytýǵa jol ashqanyn atap ótti.
«Basty maqsatymyzdyń biri – qoǵamda órkenıetti saıası dástúrdi ornyqtyrý. Ol úshin joǵary saıası jaýapkershilik mádenıetin qalyptastyrýymyz kerek. Onsyz turaqty ári jan-jaqty damý múmkin emes. Referendýmda halyqtyń qoldaýyna ıe bolǵan konstıtýsıalyq reformany jańa saıası dáýirdiń bastaýy deýge bolady. Bul ózgerister elimizdiń saıası júıesin evolúsıalyq jolmen damytýǵa jol ashty. Ádildik, ashyqtyq jáne shynaıy báseke reformalardyń negizgi arqaýyna aınaldy», - dedi Qasym-Jomart Toqaev.
Sondaı-aq, Prezıdent alda áli de aýqymdy jumys baryn atap ótti.
«Elimizde «Kúshti Prezıdent – yqpaldy Parlament – esep beretin Úkimet» qaǵıdaty ornyǵa tústi. Bul reformalar bılik ınstıtýttary júıesiniń tepe-teńdigin qalyptastyrady. Eldegi saıası úderiske azamattardyń qatysýyna jol ashady. Sondaı-aq, memlekettik basqarý júıesiniń tıimdiligin arttyra túsedi. Bizdiń osy bastamalarymyzǵa qoǵam ókilderi qoldaý bildirdi. Aýqymdy jańǵyrtý jumysyn júrgizýge múmkindik týdy. Sonyń arqasynda birneshe jylda aıtarlyqtaı nátıjege qol jetkizdik. Biraq, biz munymen toqtap qalmaımyz. Alda áli aýqymdy jumys bar», - dedi Memleket basshysy.