QR Prezıdenti Qasym-Jomart Toqaev Birikken Arab Ámirlikteriniń basshysy Zaıd Ál Nahaıandy keler jyly ótetin Astana halyqaralyq forýmyna shaqyryp, bul is-sharaǵa qatysýyn elimizge resmı saparymen ushtastyrý múmkindigin qarastyrýdy surady.
Shaqyrý hatty QR Premer-Mınıstriniń orynbasary – Syrtqy ister mınıstri Murat Nurtileý BAÁ Syrtqy ister mınıstri sheıh Abdalla ben Zaıd Ál Nahaıanǵa Ábý-Dabıde tabystady, dep habarlaıdy almaty-akshamy.kz.
QR SİM baspasóz qyzmetinen málim etkendeı, M.Nurtileý óz áriptesin Dýbaı qalasynda 30 qarasha men 12 jeltoqsan aralyǵynda ótip jatqan BUU-nyń Klımattyń ózgerýi týraly negizdemelik konvensıasyna qatysýshy memleketterdiń COP28 konferensıasyn sátti uıymdastyrýymen quttyqtady. Sondaı-aq Qazaqstan men Ámirlikterdiń klımattyń ózgerýimen kúrestegi kóshbasshylyq saıasatyn atap ótip, elderimizdiń halyqaralyq bastamalary men ulttyq mindettemeleriniń joǵary mańyzyna toqtaldy.
Ekijaqty yntymaqtastyqty talqylaý kezinde M.Nurtileý Ámirlikter Qazaqstannyń óńirdegi asa mańyzdy seriktesi ekenin jáne elderimizdi dástúrli baýyrlastyq qatynastar baılanystyratynyn aıtty.
«Taraptar QR Prezıdenti Qasym-Jomart Toqaevtyń aǵymdaǵy jyldyń qańtar aıynda Ábý-Dabıge jasaǵan resmı sapary aıasynda qol jetkizilgen ýaǵdalastyqtardyń iske asyrylý barysyn qarastyryp, eki memleket basshylarynyń jaqyn saıası dıalogynyń Qazaqstan-Ámirlikter kópsalaly qarym-qatynastarynyń jemisti damýyndaǵy sheshýshi mańyzymen kelisti», – delingen syrtqysaıasat vedomstvosynyń málimetinde.
Qazaqstan SİM basshysy ámirlik áriptesine QR Memleket basshysynyń BAÁ Prezıdenti sheıh Muhammed ben Zaıd Ál Nahaıannyń atyna 2024 jyly ótetin Astana halyqaralyq forýmyna shaqyrý hatyn tabystap, onyń bul is-sharaǵa qatysýyn elimizge resmı saparymen ushtastyrý múmkindigin atap ótti.
«Kezdesýde sońǵy jyldary damyp kele jatqan ınvestısıalyq jáne tehnologıalyq yntymaqtastyqty qoldaý men saýda-ekonomıkalyq baılanystardy ulǵaıtýǵa basa nazar aýdarylyp, taraptar ekijaqty saýda kólemin 1 mlrd AQSH dollaryna jetkizý úshin qolda bar áleýetti barynsha paıdalanýǵa kelisti.
Osy maqsatqa jetý úshin mınıstrler eki eldiń astanalary arasynda tikeleı áýe qatynasyn ashý qajettigin atap ótti jáne «Etihad Airways» pen «Air Arabia» kompanıalarynyń reısterin ashý múmkindikterin zerdeleýge ýaǵdalasty», - delingen habarlamada.
Kezdesý sońynda M.Nurtileý sheıh Abdallany kelesi jyly resmı saparmen Astanaǵa kelýge shaqyrdy.