Memleket basshysy oblystardyń jáne respýblıkalyq mańyzy bar qalalardyń ákimderimen aýyl ákimderin saılaý máseleleri jóninde keńes ótkizdi. Jıynǵa Prezıdent Ákimshiligi men Úkimettiń basshylyq quramy da qatysty, dep habarlady Almaty-akshamy.kz Aqordanyń saıtyna silteme jasap.
Prezıdent aldaǵy saılaý naýqanynyń mańyzdy ekenin atap ótti.
– Osy oqıǵany elimizdiń tarıhyndaǵy aıtýly beles dep aıtýǵa bolady. Negizi, bul biz úshin strategıalyq máni aıryqsha mindet. Azamattarymyz tuńǵysh ret jergilikti atqarýshy bıliktiń basshysyn tikeleı saılaý múmkindigine ıe bolmaq. Biz buǵan birtindep, josparly túrde keldik, – dedi Memleket basshysy.
Qasym-Jomart Toqaev aýyl ákimderin tikeleı saılaý týraly bastamany byltyrǵy Joldaýynda kótergenin eske saldy. Bir jylǵa jeter-jetpes ýaqyt ishinde bul jumys júzege asyryla bastady.
Memleket basshysy Qazaqstan halqynyń 40 paıyzdan astamy aýylda turatynyna toqtalyp, bul saıası shara, eń aldymen, aýyl turǵyndarynyń múddesi úshin jasalyp jatqanyn jetkizdi.
– Aldaǵy saılaý biz júzege asyryp jatqan saıası reformalarǵa tyń serpin beredi dep senemin. Sondaı-aq turǵyndardy el basqarý jáne sheshim qabyldaý úderisine tartýǵa jol ashady, – dedi Qasym-Jomart Toqaev.
Memleket basshysy partıalyq básekeni kúsheıtý máselesine nazar aýdardy. Partıadan úmitker usyný memlekettiń ınstıtýsıonaldyq tutastyǵyn bekemdeı túsedi jáne saıası úderistiń barynsha ashyq bolýyna septigin tıgizedi.
Osy rette Qasym-Jomart Toqaev jergilikti atqarýshy bıliktiń jaýapkershiligi joǵary bolýǵa tıis ekenine basa mán berdi.
– Ákimder – bıliktiń árbir eldi mekendegi tikeleı ókili. Jurt olardyń qyzmetine qarap búkil memlekettik basqarý júıesiniń tıimdiligin baǵalaıdy. Sondyqtan tıimdi memleket jáne ádiletti qoǵam talaptaryna saı bolý úshin aldaǵy saılaýdy durys uıymdastyrý óte mańyzdy, – dedi Qasym-Jomart Toqaev.
Sonymen qatar Prezıdent óńir basshylaryna birqatar mindet júktedi.
Atap aıtqanda Memleket basshysy elimizdegi sanıtarlyq-epıdemıologıalyq ahýaldyń áli de kúrdeli ekenine nazar aýdardy. Onyń aıtýynsha, Qazaqstannyń jasyl aımaqta turǵanyna qaramastan, bosańsýǵa áli erte, koronavırýstyń úndistandyq túriniń bizdiń elimizde de bolýy yqtımal.
Osyǵan baılanysty Prezıdent sanıtarlyq-epıdemıologıalyq shekteýlerdiń jıi buzylyp jatqanyn jáne halyqty vaksınalaý qarqynynyń báseńsip qalǵanyn aıtty.
– Ákimder azamattarǵa ekpe salý naýqanynan shettep qalǵan sıaqty. Áleýmettik nysandardyń, bıznes kásiporyndardyń jáne jalpy eldiń ekonomıkasy vaksınalaýdyń sátti júrgizilýine tikeleı baılanysty ekenin túsiný kerek. Qazir jappaı vaksınalaý naýqany ákimder jumysynyń eń mańyzdy mindetteriniń qatarynda bolýy qajet. Sizder barynsha belsendilik tanytyp, azamattardy vaksınalaý naýqanyna ózderińiz jetekshilik etýlerińiz kerek, – dedi Prezıdent.
Memleket basshysy sybaılas jemqorlyqqa qarsy aldyn alý jumystaryn kúsheıtýge shaqyrdy. Prezıdenttiń aıtýynsha, byltyr ártúrli deńgeıdegi 7 ákim men olardyń orynbasarlary, sondaı-aq, 14 oblystyq basqarma basshysy men olardyń orynbasarlary qylmystyq jaýapkershilikke tartylǵan. Budan bólek 2020 jyldyń qańtarynan 2021 jyldyń naýryzyna deıingi aralyqta qaramaǵyndaǵy qyzmetkerleriniń jemqorlyqqa qatysy bolǵany úshin 20 saıası qyzmetkerge qatysty shara qoldanyldy.
Qasym-Jomart Toqaev ákimderge óz aımaqtaryndaǵy sybaılas jemqorlyqty boldyrmaý úshin júıeli jumystar júrgizýdi tapsyrdy. Al jemqorlyqqa qarsy kúres qyzmeti ózderine júktelgen mindetke sergek qaraǵany jón.
– Buǵan deıin aıtqanymdaı, eger memlekettik qyzmetshi búdjet qarjysyn jymqyrýdy nemese para alyp baıýdy kózdemeı, sheshim qabyldaý kezinde qatelikke jol bergen bolsa, onda ol qylmystyq jaýapkershilikke tartylmaýy kerek. Áıtpese, memlekettik apparattyń berekesin ketiremiz. Sybaılas jemqorlyqqa sanaly túrde barǵan sheneýnik qylmystyq jaýapkershilikke tartylýy tıis, – dedi Prezıdent.
Memleket basshysy ótken jylytý maýsymy barysynda bolǵan oqys oqıǵalar, órt jáne tehnologıalyq apattar máselesine basa mán berdi. Prezıdent tótenshe jaǵdaılardyń saldaryn jedel joıý jumystaryn qamtamasyz etý jóninde túbegeıli sharalar qabyldaýdyń qajettigine nazar aýdardy.
Budan bólek Qasym-Jomart Toqaev qoǵamdyq múlikti búldirý, buzaqylyq jáne vandalızm sıaqty oqıǵalardyń jıilep ketkenine toqtaldy.
– Jýyrda elordada mas adam lıftidegi monıtordy syndyrǵany úshin oǵan 14 myń teńge ǵana aıyppul salynǵan. Bulaı bolmaıdy. Mundaı is-áreket úshin keminde 15 táýlikke qamaý kerek nemese 1 jylǵa túzetý jumystaryna salý jóninde jaza kesý qajet. Mundaı jaǵdaılarǵa múldem tózbeý kerek. Jeńil jaza jaramaıdy. Al is júzinde jazalamaý saldary quqyq buzýshylyq pen qylmystyń odan ári órshýine alyp keledi. Sondyqtan osy másele boıynsha zańnamany qatańdatý kerek, – dedi Prezıdent.
Memleket basshysy bıyl dástúrli formatta ótetin jańa oqý jylyna daıyndyq jumystaryn qazirden bastap qolǵa alý qajet ekenin aıtty. Onyń aıtýynsha, kóptegen bilim ordalary bir jyldan astam ýaqyt tolyqqandy jumys istemedi. Bul rette, Qasym-Jomart Toqaev ýnıversıtetterdiń, mektepter men balabaqshalardyń ınfraqurylymdarynyń daıyndyǵyn, sonymen qatar oqytýshylar men tárbıeshiler shtatynyń jasaqtalý deńgeıin tekserýdi tapsyrdy.
Prezıdent jıyn sońynda óńirlerdegi ahýal úshin ákimderdiń ózderi jaýap beretinin eske salyp, qoǵamdyq-saıası turaqtylyqty jáne ornyqty damýdy qamtamasyz etý olardyń tikeleı mindeti ekenin atap ótti.
İs-shara barysynda Almaty oblysynyń ákimi Amandyq Batalov, Túrkistan oblysynyń ákimi Ómirzaq Shókeev, Jambyl oblysynyń ákimi Berdibek Saparbaev, Aqtóbe oblysynyń ákimi Ońdasyn Orazalın jáne Aqmola oblysynyń ákimi Ermek Marjyqpaev Memleket basshysyna aýyl ákimderiniń aldaǵy saılaýyna daıyndyq barysy jáne óńirlerdi damytý jónindegi tapsyrmalarynyń oryndalýy týraly baıandady.
