Memleket basshysy Qasym-Jomart Toqaev Aýǵanstan halqyn gýmanıtarlyq daǵdarys qaterimen jekeleı qaldyrýǵa bolmaıtynyn aıtty, dep habarlaıdy Almaty-akshamy.kz QazAqparatqa silteme jasap.
«Álemde bolyp jatqan oqıǵalar terorızm, ekstremızm, transulttyq qylmys qazirgi zamannyń ózekti syn-qateri retinde qalyp otyrǵanyn kórsetip tur. Bul jaǵdaıda Azıadaǵy ózara is-qımyl jáne senim sharalary keńesi (AÓİSSHK) qyzmeti erekshe ózekti bolady. Qazaqstan forýmnyń is basyndaǵy tóraǵasy bolyp otyr jáne AÓİSSHK keńistiginde qaýipsizdik pen yntymaqtastyqty nyǵaıtý úshin barsha kúsh-jigerin salady. Forýmnyń ınstıtýsıonaldy ary qaraı damýy, onyń halyqaralyq uıymǵa transformasıasy bul jumysqa jańa serpin beredi dep sanaımyz», - dedi Qasym-Jomart Toqaev «Ortalyq Azıa – Úndistan» samıtinde.
QR Prezıdenti Azıadaǵy ózara is-qımyl jáne senim sharalary keńesiniń áleýeti men mártebesin nyǵaıtýda Úndistannyń róli aýqymdy ekenin atap ótti.
«Osy jyly AÓİSSHK-niń mereıtoılyq samıti ótedi. Osy oraıda Modı myrzany (Úndistan Premer-mınıstri Narendra Modı) Qazaqstan astanasynda kóretinimizge úmittenemiz. Forým aıasynda talqylaýǵa shyǵarylatyn ózekti máselelerdiń qatarynda Aýǵanstan problematıkasy da bolady», - dedi Memleket basshysy.
Osy oraıda Qasym-Jomart Toqaev Aýǵanstan men onyń halqyn teńdessiz qıyndyqtarymen jáne gýmanıtarlyq daǵdarys qaterimen jekeleı qaldyrýǵa bolmaıtynyn qadap aıtty.
Qazaqstan óz tarapynan azyq-túlik, qajetti taýarlarmen jáne dári-dármek túrindegi kómekti baǵyttaı otyryp, Aýǵanstanmen ózara is-qımyldy jalǵastyryp keledi.