Prezıdent Almaty qalasyna jumys sapary aıasynda 1970 jyly ózi bitirgen İlıas Esenberlın atyndaǵy №25 mektep-gımnazıasyna bardy dep habarlaıdy almaty-akshamy.kz
Memleket basshysy zamanaýı ınteraktıvti oqý quraldarymen jabdyqtalǵan kabınetterdi, akt zaly men mektep kitaphanasyn aralap kórdi.
Qasym-Jomart Toqaev kezinde ózi oqyǵan synypqa kirdi. Qazirgi ýaqytta bul kabınette fransýz tili oqytylady.
Budan bólek Memleket basshysy mektep tarıhyna arnalǵan mýzeıdiń ekspozısıasymen tanysty. Onda oqý ordasynyń ótkeni týraly túrli arhıv qujattary, belgili túlekterdiń ómirbaıandary men fotosýretteri jınaqtalǵan.
Sodan keıin Prezıdent mektep kitaphanasyndaǵy Qurmetti qonaqtar kitabyna qoltańba qaldyrdy.
Qasym-Jomart Toqaevqa 1970 jyly 10 «V» synybynyń atynan ózi jazǵan hat kórsetildi. Bul hat ýaqyt kapsýlasyna salynyp, mektep qabyrǵasyna qalanǵan eken.
«Bizdiń atqarǵan isimiz az emes, degenmen áli de jumys kóp. Biz 10-synypty jaqsy bitirýge ýáde beremiz. Instıtýtqa túsý emtıhandaryn jaqsy tapsyrýǵa ýáde beremiz. Al ony bitirgen soń jumys isteımiz. 2017 jyly 64-65 jasqa tolǵan kezimizde sizderdiń kózderińizge tik qaraýǵa uıalmaıtyndaı bolyp kelýge ýáde beremiz», – dep jazylǵan hatta.
Dástúrdi jalǵastyrǵan 11-synyp oqýshylary Memleket basshysymen birge 2050 jylǵa arnalǵan hatty ýaqyt kapsýlasyna salyp, mektep qabyrǵasyna qoıdy.
