Býrabaıda ótip jatqan Ulttyq quryltaıda Memleket basshysy Qasym-Jomart Toqaev áıelder kolonıasyndaǵy jaǵdaıǵa baılanysty óz pikirin bildirip, bul máseleni qaıta qaraýdy usyndy, dep habarlaıdy aqshamnews.kz
«Taǵy bir mańyzdy másele. Maǵan belgili advokat Aıman Omarova hat joldady. Ol óz hatynda kúrdeli taqyrypty qozǵap, áıelder kolonıasyndaǵy ahýalǵa toqtaldy. Ásirese, júkti áıelder men kishkentaı balalary bar áıelderdiń jaǵdaıyna basa nazar aýdardy», – dedi Prezıdent.
Qasym-Jomart Toqaev elimizdegi qylmystyq-atqarý júıesiniń basty maqsaty sottalǵan azamattardy jazalaý emes, túzetý bolýy kerek ekenimen kelisetinin aıtty.
«Er adam nemese áıel bolsyn, bas bostandyǵynan aıyrylǵandardyń bári zań aldynda birdeı ekeni túsinikti», – dep atap ótti ol.
Alaıda, Memleket basshysy adamgershilik qundylyqtardy basshylyqqa ala otyryp, «Zań men tártip» qaǵıdatyn saqtaı otyryp, kámeletke tolmaǵan balasy bar áıelderge qatysty keıbir zańdyq ustanymdardy qaıta qaraýǵa bolatynyn aıtty.
«Quqyq qorǵaý organdary men depýtattar osy máseleni baıypty ári jan-jaqty zerttep, sheshim qabyldaý úshin usynystar engizýi kerek», – dedi Qasym-Jomart Toqaev.