Býrabaıda Prezıdenttiń qatysýymen Ulttyq quryltaı ótip jatyr.
Jıynda Memleket basshysy Qasym-Jomart Toqaev otandyq kınoındýstrıa jaıyna da toqtaldy. Prezıdenttiń sózinshe, qazir kınoteatrda kórsetiletin fılmderge qatysty qoǵamdyq syn bar.
«Byltyr qazaqstandyq mamandar túsirgen 94 fılm shyqqan, ıaǵnı, negizinen ózimizdiń ónim shyǵarylyp jatyr. Bul – jaqsy úrdis. Biraq biz eń aldymen sanǵa emes, sapaǵa kóńil aýdarýymyz kerek. Kórermenniń kóńilin kóterip, kúlki syılaý – bir bólek, jaǵymsyz ádetterdi nasıhattaý – bir basqa. Zorlyq-zombylyqty, qatygezdik pen qylmysty nasıhattaıtyn fılmder de paıda boldy. Osy jerde bir nárseni eskergen jón. Búginde fılmderdiń basym kópshiligi memlekettik tapsyryspen emes, jeke qarjyǵa túsirilýde. Kıno mańyzdy ıdeologıalyq qural ekenin bárimiz jaqsy túsinemiz. Sondyqtan jeke qarjyǵa túsirilse de, fılmdi kınoteatrǵa shyǵarmas buryn aldyn ala súzgiden ótkizý joldaryn qarastyrǵan jón», - dedi Prezıdent.
Sondaı-aq Prezıdent jaqynda shyqqan «Shoqan. Qashqarıa sapary» múltfılmi jaıly da óz oıyn aıtty.
«Bul óskeleń urpaqqa áıgili tarıhı tulǵa Shoqan Ýálıhanov týraly málimet beretin óte jaqsy týyndy dep aıtýǵa bolady. Qazaq tilinde ulttyq naqyshta túsirilgen osyndaı múltfılmder kóp bolýy qajet. Bul – ult bolashaǵyna tikeleı yqpal etetin másele. Sondyqtan anımasıany damytý máselesin qolǵa alý kerek», - dedi Memleket basshysy.