Býrabaıda ótip jatqan Ulttyq quryltaıda Memleket basshysy Qasym-Jomart Toqaev kásibı tehnıkalyq kolejderdiń jańa mamandyqtarǵa suranysty jáne eńbek naryǵyndaǵy jaǵdaıdy eskerip jumys isteýi qajettigin atap ótti, dep habarlaıdy aqshamnews.kz
«Dmıtrıı Pavlenko durys másele kóterdi. Kásibı tehnıkalyq kolejder jańa mamandyqtarǵa suranysty jáne eńbek naryǵyndaǵy jaǵdaıdy eskerýge tıis», – dedi Prezıdent.
Qasym-Jomart Toqaev sarapshylardyń pikirine silteme jasap, aldaǵy jyldary soltústiktegi halyqtyń sany edáýir azaıyp, ońtústiktegi turǵyndar áldeqaıda kóbeıýi múmkin ekenin aıtty.
«Bul – óte ózekti másele. Sebebi aımaqtardyń eńbek naryǵynda teńsizdik odan ári ýshyǵa túsedi degen sóz», – dedi Memleket basshysy.
Prezıdent osy máseleni Úkimettiń muqıat qaraýy kerek ekenin atap ótip, Qostanaıdaǵy kolejdiń tájirıbesin soltústik aımaqtarda keńinen qoldanýdy usyndy.