Almatyda Ábilhan Qasteev atyndaǵy QR Memlekettik óner mýzeıinde «Dástúr -halyq rýhy. Dala qazynasy» atty kórmesi ashyldy, dep habarlaıdy almaty-akshamy.kz.
Ekspozısıada mýzeı qoryndaǵy Qazaqstannyń dástúrli jáne qazirgi zamannyń sándik-qoldanbaly óneriniń 60-tan astam týyndysy usynylǵan.
Kórmege kelýshiler qazaqtyń halyq qolónershileri men ár urpaqqa jatatyn sándik-qoldanbaly ónerdegi kásibı sýretshilerdiń jumystarymen tanysa alady. Olardyń ishinde kıiz, toqylǵan jáne kestelengen kilemder, gobelender, at-ábzelderi, aǵash, teri, metal sheberleriniń týyndylary bar.
Kórmeniń taǵy bir tutas bólimi qabyrǵaǵa kestelengen túskıizderge arnalǵan. Kıiz úıdiń sándik bezendirilýinde tórden qurmetti oryn alyp, otbasylyq baqyt pen amandyqty beıneleıdi. Qazirgi sándik-qoldanbaly ónerdiń eń keń taralǵan túri gobelenderge de arnalǵan jeke ekspozısıa bar.
Atalmysh kórme qazirgi zamanǵy mádenıet turǵysynan halyq ónerin saqtaý men zerdeleýdiń mańyzyn kórsetedi. İs-shara 2024 jyldyń 30 tamyzyna deıin jalǵasady.