Ábilhan Qasteev atyndaǵy QR Memlekettik óner mýzeıi Qazaqstan halqy Assambleıasynyń 30 jyldyǵyna oraı óz qorynan «XX-XXI ǵasyrlar óneri» ekspozısıasyn usynyp otyr.
Kórmede T.Ialonskaıa (Ýkraına), I.Klychev (Túrikmenstan), N.Nıkogosán (Armenıa), Iý.Gýseınov (Ázirbaıjan), V.Kalnroze (Latvıa), V.Býrmakın (Ózbekstan) syndy ózge de tanymal sýretshilerdiń kartınalary bar.
Óner tili aıqyn jáne mánerli, bárine túsinikti jáne aýdarmany qajet etpeıdi. Sondyqtan bul ózara túsinistikke, birlikke jol ashatyn, bir-birin jaqsy bilýge, basqa adamdardyń, halyqtar men mádenıetterdiń kózqarasyn, jan dúnıesin túsinýge kómektesetin qoljetimdi qural desek te qatelespeımiz.
Iá, óner bárimizge ortaq jáne ol bizge tilsiz-aq mańyzdy dúnıeler týraly aıtady: mahabbat pen sulýlyq, baqyt pen qaıǵy, paryz ben ar-namys, adaldyq pen dostyq. Ulttyq mektepter dástúrinde jumys isteıtin avtorlar keıipkerleriniń álemin ulttyq bastamalar arqyly ashýdy kózdeıdi.
– Sýretshiler ózderine jaqyn tájirıbeni shartty estetıkalyq keńistikke, ıntellektýaldy-poetıkalyq kózqaras arqyly jetkizedi. Ár sheberdiń ózindik stıli men shyǵarmashylyq tásili, keskindeme tehnıkasy men janrlyq qalaýy bar. Ekspozısıada, máselen, Armenıadan kelgen búlikshi aqynnyń ekspresıvti emosıonaldy portreti, jemisteri bar dástúrli shyǵys taǵamdary, kúnde qoldanystaǵy turmystyq zattar, tańerteńgi kún sáýlesindegi shyryndy-jasyl baqtar, Latvıa aýyly, sýattaǵy beıne, kilem toqyp otyrǵan halyq qolónershileri, tańsáride balyq aýlaýǵa shyqqan balyqshylar beınenlegen shyǵarmalar bir-birimen ózara úılesim tapqan. Óner de halyqty bir-birimen jaqyndastyradi, – deıdi Á.Qasteev atyndaǵy QR Memlekettik óner mýzeıiniń «Shetel óneri» bóliminiń jetekshisi Vıoletta Vologodskaıa.
