Álıhan Smaıylov pen NCOC kompanıasynyń basshylyǵy Qashaǵannyń damý jobalaryn júzege asyrý barysyn talqylady
QR Premer-Mınıstri Álıhan Smaıylov pen North Caspian Operating Company N.V. basqarýshy dırektory Olıve Lazar, sondaı-aq Soltústik Kaspıı jobasyna qatysýshy kompanıalardyń basshylary Qashaǵan munaı-gaz ken ornyn ıgerýdiń ózekti máselelerin talqylady, dep habarlaıdy Almaty-akshamy.kz.
Keńeske qatysýshylar Qazaqstannyń ekologıalyq zańnamasynyń normalaryn saqtaý, aǵymdaǵy óndiristiń turaqtylyǵyn qamtamasyz etý, Qashaǵan ken ornynyń bolashaq keńeıtý jobalaryn iske asyrý jáne óndiris deńgeıin ulǵaıtý jónindegi sharalar, sondaı-aq jańa ınvestısıalyq jobalardy iske asyrý, atap aıtqanda, gaz óńdeý zaýyttaryn salý máselelerin talqylady.
Premer-Mınıstr konsorsıým kompanıalary Qazaqstanda jumys istegen jyldary kóptegen ekonomıkalyq jáne áleýmettik mindetti sheshýge qatysyp, tıimdi seriktester retinde tanylǵanyn atap ótti.
«Úkimet Qashaǵan ken ornynyń turaqty jumysyna jáne odan ári ıgerilýine erekshe nazar aýdarady. Bul – strategıalyq aktıv, sondyqtan Qashaǵan ken ornynyń bolashaq damý jobalaryn ýaqytyly iske asyrý biz úshin mańyzdy», — dedi Álıhan Smaıylov.
Kezdesý qorytyndysy boıynsha taraptar birlesip jumys isteý jáne kózdelgen josparlarǵa qol jetkizý aıasynda syndarly dıalogqa daıyn ekenderin rastady.