Almatyda kóshelerdi jańǵyrtýdyń jańa qaǵıdaty – «qasbetten qasbetke deıin» engizilýde. Bul týraly Almaty ákimi Erbolat Dosaev 2025–2027 jyldarǵa arnalǵan qalalyq búdjet talqylanyp jatqan máslıhat sesıasynda málimdedi.
«Búginde álemniń damyǵan megapolısterinde barlyq ınfraqurylymdyq qabatty jańǵyrtý arqyly kóshelerdi keshendi kóriktendirý jumystary «qasbetten qasbetke deıin» qaǵıdaty boıynsha júrgizilýde. Biz Almatyda alǵash ret osy halyqaralyq tájirıbeni qoldana bastadyq», – dedi qala basshysy.
Ákimniń aıtýynsha, «qasbetten qasbetke deıin» qaǵıdaty boıynsha qazirgi ýaqytta Dostyq dańǵylynyń ál-Farabı dańǵylynan Qurmanǵazy kóshesine deıingi jáne Pýshkın kóshesiniń Gogol kóshesinen Raıymbek dańǵylyna deıingi bóligin jańǵyrtý jobalary aıaqtaldy. Qurylys jumystary 2025 jyldyń naýryz aıynda bastalady. Bul maqsatqa 3,7 mlrd teńge qarastyrylǵan.
2025 jyly Radostoves, Maqataev, Áýezov, Gogol, Jandosov, Rozybakıev jáne Sátbaev syndy taǵy 7 kósheni jobalaý aıaqtalady.
«Almatybasjospar» ǴZI JSHS-niń málimetinshe, jobalyq jumystar aıasynda qalalyq ınfraqurylymdy keshendi qaıta qurý kózdelgen: kósheler zamanaýı jaıaý júrginshiler joldarymen jabdyqtalyp, turǵyndardyń qaýipsizdigin ári jaılylyǵyn qamtamasyz etedi. Trotýarlarda jaıly oryndyqtar, kúrkeler, qoqys jáshikteri jáne jańa jaryqtandyrý baǵanalary ornatylady.
Barlyq jumys Almaty turǵyndary men qonaqtary úshin jaıly, ekologıalyq jáne tartymdy orta qurýǵa baǵyttalǵan zamanaýı kóriktendirý standarttaryn eskere otyryp júrgiziledi.